У Гаазе пачаў працу офіс для расследавання расейскай агрэсіі ва Украіне

Гэта першы крок да стварэння міжнароднага трыбунала.

У Гаазе ў панядзелак, 3 ліпеня, адкрыўся Міжнародны цэнтр для пераследу злачынства агрэсіі супраць Украіны (ICPA), паведамляе «Нямецкая хваля». У яго склад уваходзяць прадстаўнікі Украіны, Еўразвяза, ЗША і Міжнароднага крымінальнага суда (МКС), а задачамі новай арганізацыі будзе з'яўляцца правядзенне расследавання і збор довадаў злачынства агрэсіі супраць Украіны.

Са слоў еўракамісара па юстыцыі Дзідзье Рэйндэрса, гэта першы канкрэтны крок на шляху да прыцягнення да адказнасці вінаватых у агрэсіі супраць Украіны. «Гэта сведчанне сусветнай барацьбы супраць беспакаранасці... Мы абавязаныя падтрымліваць Украіну столькі, колькі неабходна», - сказаў ён на прэс-канферэнцыі ў Еўраюсце.

Кіраўнік Еўраюста: Будзе 20 пракурораў з некалькіх краін

Усе пракуроры будуць працаваць тут, на базе Еўраюста, указаў кіраўнік ведамства Ладзіслаў Хамран. Іх будзе 20 чалавек з розных краін, дадаў Хамран, адмовіўшыся назваць канкрэтныя дзяржавы. Тым часам ЗША пацвердзілі, што ад іх будзе пракурор.

На наступным этапе прадстаўнікі краін, у якіх ужо ідуць расследаванні злачынства агрэсіі ў дачыненні да Украіны, - гэта Літва, Латвія, Эстонія, Украіна і Польшча - аб'яднаюць свае довадныя базы і будуць шукаць сувязь паміж элементамі злачынства агрэсіі і дзеяннямі палітычных і вайсковых кіраўнікоў РФ.

Генпракурор Украіны: Гістарычны момант

Генеральны пракурор Украіны Андрэй Косцін, які прысутнічаў на адкрыцці цэнтра, паведаміў, што чатыры ўкраінскія пракуроры ўжо знаходзяцца ў Гаазе і сёння пачалі працу. Ён назваў гэты момант гістарычным.

- Сёння вы бачыце тут наша адзінства. Мы аб'ядналіся, каб забяспечыць поўнае прыцягненне да адказнасці за злачынства агрэсіі і ўсе астатнія 93000 інцыдэнтаў ваенных злачынстваў. Стварэнне спецыяльнага трыбунала цяпер непазбежнае, ён будзе створаны, бо тут і сёння мы ўжо пачалі, - падкрэсліў Косцін.

«Пачатак канца беспакаранасці за злачынства агрэсіі»

Як паведаміў у Telegram Офіс генеральнага пракурора Украіны, новы цэнтр мае асаблівае значэнне для Украіны, бо гаворка ідзе аб «пачатку канца беспакаранасці за злачынства агрэсіі». «Гэта выразны сігнал, што свет аб'яднаны і непахісны для забеспячэння адказнасці расейскага рэжыму за ўсе яго злачынствы: злачынства агрэсіі, генацыд і вайсковыя злачынствы», - адзначаецца ў заяве. Са слоў Косціна, ICPA папоўніць прабел па адказнасці за злачынства агрэсіі ў міжнародным крымінальным правасуддзі і «стане адным з элементаў, які ўзмоцніць юрыдычныя механізмы забароны агрэсіі, дапоўніць і ўмацуе гэтую архітэктуру».

У цырымоніі адкрыцця ICPA таксама ўдзельнічаў пракурор МКС Карым Хан, памочнік Генпракурора ЗША Кенэт Полайт, міністр юстыцыі Нідэрландаў Дылан Ешыльгёз-Зегерыус, а таксама генпракуроры Латвіі, Літвы і Румыніі Юрыс Стуканс, Ніда Грунскене і Алекс Флорын. JIT), адзначыў Офіс генеральнага пракурора Украіны.

Прадстаўнікі JIT будуць працаваць разам з украінскімі пракурорамі пры падтрымцы спецпракурора ЗША па злачынстве агрэсіі. Іншыя краіны і інстытуцыі змогуць далучыцца да іх у найбліжэйшыя месяцы, паведаміў Косцін.