Дзюдаіст Вахавяк: Захапляюся ўсімі, хто выступіў за перамены

У беларусаў ужо не будзе ранейшага жыцця.

Беларускі дзюдаіст і падпісант ліста за сумленныя выбары Аляксандр Вахавяк у інтэрв'ю «Люстэрку» расказаў, што не шкадуе, што не прамаўчаў пасля фальсіфікацыі прэзідэнцкіх выбараў у Беларусі ў 2020 годзе.

– У 2020-м вы казалі, што людзі, якія не падзяляюць ваша гледзішча, не ворагі. За гэтыя тры гады не з'явілася больш катэгарычнасці?

– Не. Усе мы дарослыя людзі, адукаваныя, правільна? У кожнага свая пазіцыя. Не спрабаваў нікога пераканаць ні раней, ні цяпер. Бескарысна. Проста з чалавекам перастаеш размаўляць ці неяк абыходзіш спрэчныя тэмы. Навошта марнаваць нервы?

– Разумееце людзей, якія не з'ехалі з Беларусі?

– Вядома. Хтосьці звыкся з пэўным ладам жыцця і баіцца пачынаць зноўку за мяжой. Змена становішча – таксама рызыка. У кагосьці пажылыя бацькі, якія патрабуюць догляду. Лёгка сядзець у бяспецы і вучыць з-за мяжы. А ў Беларусі паставіў не той лайк – могуць быць праблемы. Трэба глядзець на рэчы не толькі са сваёй званіцы.

– Што для вас значыць 9 жніўня 2020 года?

– Пункт пераменаў. У беларусаў ужо не будзе ранейшага жыцця. Тое, што будаваў раней, абвалілася. Хоць толькі выказаў сваё меркаванне. У сучасным свеце выказвацца – гэта нармальна. Мы ж не належым да рабаўладальніцкага ладу. А ў Беларусі, выходзіць, можна думаць што заўгодна, але не гаварыць уголас. Нават у сне нельга «спаліцца».

– Пашкадавалі хоць раз за тры гады, што не прамаўчалі?

– Не. Нельга было заплюшчваць вочы на дзікасць, якая мела месца пасля выбараў. Захапляюся ўсімі, хто выступіў за перамены, хто прайшоў і праходзіць усе выпрабаванні: турма, страта працы, немагчымасць абняць блізкіх, – сказаў Вахавяк.