Крысціна Ціманоўская прабегла 200 метраў з сімвалічным вынікам 23.34 і страціла прытомнасць

Беларуска бярэ ўдзел у яшчэ адной эстафеце на чэмпіянаце свету ў лёгкай атлетыцы ў Будапешце.

У паўфінале на чэмпіянаце свету ў лёгкай атлетыцы ў Будапешце беларуска, якая выступае за Польшчу, Крысціна Ціманоўская прыбегла 8-й і не трапіла ў фінал, але паказала сімвалічны вынік - 23.34 секунды.

«Гэта спорт. На жаль, я страціла прытомнасць пасля фінішу і нічога не памятаю, - напісала ў сваім інстаграме Крысціна. - Пасля 150 метраў усё было як у тумане».

На дыстанцыі 100 метраў Ціманоўская таксама не здолела прабіцца ў фінал.

Засталася для Крысціны толькі адна дысцыпліна: эстафета 4 па 100 метраў.

Чэмпіянат свету скончыцца ў нядзелю.

Крысціна Ціманоўская падчас Алімпійскіх гульняў у Токіё ў 2021 годзе раскрытыкавала кіраўніцтва беларускай каманды за тое, што яе разам з іншымі спартоўкамі хацелі паставіць бегчы эстафету на той дыстанцыі, якую яна ніколі не бегала (яна заяўлялася на 100 і 200 метраў).

Пасля гэтага яе адхілілі ад спаборніцтваў і спрабавалі вывезці ў Беларусь, але яна адмовілася пакінуць Японію і папрасіла міжнародную абарону. Пазней спартоўка пераехала ў Польшчу і атрымала грамадзянства гэтай краіны.

Артыкул 23.34 Кодэкса аб адміністрацыйных правапарушэннях (у новай рэдакцыі гэта ўжо 24.23) вызначаў парушэнне «парадку арганізацыі або правядзення масавых мерапрыемстваў».

Паводле гэтага артыкула ў 2020-2021 гадах прайшлі тысячы чалавек. Таксама а 23.34 запускаліся феерверкі і салюты.