Нафтавы бізнэс Прыгожына неспадзеўкі перапісалі на паліцыянта з Пецярбурга

У тэлефонных кнігах ён запісаны як "Валодзя Опер".

Кампанію кіраўніка ПВК "Вагнер" Яўгенія Прыгожына, якая займалася здабычай нафты ў Сірыі, перапісалі на паліцыянта з Санкт-Пецярбурга.

Уласнік кампаніі "Велада" змяніўся 12 верасня, вынікае са звестак "Контур.Фокус", на якія звярнула ўвагу выданне "Вёрстка". Новым уладальнікам нафтавага бізнэсу Прыгожына стаў 27-гадовы Уладзімір Злянко.

Паводле звестак «Вёрсткі», як мінімум да 2021 года Злянко служыў паліцыянтам і браў заплату ва ўправе МУС Прыморскага раёна Пецярбурга. У тэлефонных кнігах іншых карыстальнікаў ён запісаны як "Валодзя Опер" і "Уладзімір МУС". У чыіх інтарэсах ён стаў намінальным уладальнікам кампаніі Прыгожына, невядома.

"Велада" была заснаваная ў 2015 годзе, а ў 2019-м яна атрымала кантракт на здабычу нафты і газу ў Сірыі на радовішчы плошчай 2159 кв.км. Пра яе сувязь з Прыгожыным пісала "Новая газета".

Гэта першы вядомы факт змены ўласніка кампаніі з бізнэс-імперыі Прыгожына. Да гэтага іх толькі ліквідоўвалі. Так, напрыклад, на пачатку верасня заяву на ліквідацыю падала кампанія "Пальміра", асноўным тыпам дзейнасці якой было будаўніцтва.

Кіраўнік ПВК "Вагнер" загінуў у авіякатастрофе: 23 жніўня ягоны прыватны самалёт разбіўся ў Цверскай вобласці. Усе дзесяць чалавек, якія знаходзіліся на борце, загінулі. Паводле спісаў Расавіяцыі, сярод пасажыраў былі сам Прыгожын, камандзір ПВК Дзмітрый Уткін, а таксама іншыя камандзіры і найміты "Вагнера".

Пасля смерці Прыгожына паміж расейскімі спецслужбамі разгарнулася барацьба за актывы ягонай імперыі — байцоў ПВК, фабрыку троляў і аперацыі ў Афрыцы. Падзяліць іх паміж сабой спрабуюць Служба замежнай выведкі (СЗР) і выведка Мінабароны — Галоўнае ўправа Генеральнага штаба (ГРУ), пісала The New York Times са спасылкай на заходніх службоўцаў, знаёмых са звесткамі выведкі.

З іхніх слоў, СЗР можа адысці мэдыябізнэс кіраўніка ПВК — арганізацыі, якія займаюцца прапагандай і дэзінфармацыяй за мяжой, тады як аперацыі наймітаў, мабыць, адыдуць Мінабароны і ГРУ.

Пры гэтым частка цывільных актываў можа дастацца сыну Прыгожына Паўлу, кажа палітычны тэхнолаг Максім Шугалей, які працаваў на кіраўніка ПВК «Вагнер». Ён нагадаў, што перад смерцю Прыгожын перавёў на яго свае дэвелоперскія кампаніі ў Пецярбургу.