За што ДАІ дае штрафы на 111 рублёў падчас восеньскіх рэйдаў?

Іх атрымалі ўжо 23 тысячы беларусаў.

ДАІ Беларусі абвясціла па ўсёй краіне рэйды. Пад асаблівым кантролем будуць пешаходы, веласіпедысты, і тыя, хто перамяшчаецца на сродках персанальнай мабільнасці, паведамляе "Тэлеграф".

У Дзяржаўтаінспекцыі Менска гавораць, што найбліжэйшыя дні на аварыйнасць, бяспеку ўдзельнікаў дарожнага руху, паўплывае восеньскае надвор'е (стала раней цямнець). Таму, для прадухіленняў ДТЗ, прафілактыкі траўматызму дзяцей, пешаходаў, веласіпедыстаў і тых, хто перамяшчаецца на сродках персанальнай мабільнасці, з 15 да 24 верасня ДАІ правядзе прафілактычныя мерапрыемствы.

На кантролі будуць аварыйна-небяспечныя адцінкі дарог Менска, а таксама пешаходныя пераходы, якія не рэгулююцца.

Гэтымі ж днямі ДАІ ўзмоцніць кантроль і ў Менскай вобласці. Тут інспектары таксама правядуць прафілактыку бяспекі ўразлівых удзельнікаў дарожнага руху (гэта пешаходы, веласіпедысты, удзельнікі коннага транспарту).

Акрамя супрацоўнікаў міліцыі, залучаць дружыннікаў і людзей з іншых грамадскіх фармаванняў. Асаблівы кантроль будзе там, дзе шмат пешаходаў: прыпынкі, нерэгуляваныя пешаходныя пераходы, пешаходныя зоны каля крамаў і г.д.

Таксама пад назіраннем будуць вуліцы, адцінкі дарог, дзе ёсць высокая рызыка наездаў на пешаходаў, асабліва ў «час пік» і ўвечары.

Усяго ў вобласці здарылася 99 ДТЗ з удзелам пешаходаў, з іх 33 адбылося па віне саміх пешаходаў. Да адказнасці прыцягнулі 23 473 ўдзельнікі дарожнага руху, 5 тысяч у стане алкагольнага ап'янення, не абазначаныя флікерамі — 9 136.

ДАІ Гомельскай вобласці з 15 да 17 верасня правядзе адпрацоўку трасы М10 «Мяжа РФ - Гомель – Кобрын». Патрулі ДПС будуць выстаўленыя там, дзе павышаная імавернасць учынення ДТЗ. Інспектары будуць весці галосны, схаваны і змяшаны кантроль, у тым ліку з выкарыстаннем аўтамабіляў без спецафарбоўкі.

Асаблівую ўвагу нададуць парушэнням, якія прыводзяць да ДТЗ з цяжкімі наступствамі. Гэта: кіраванне транспартам п'янымі і бяспраўнікамі, парушэнні ўсталяваных хуткасных рэжымаў, правіл абгону, перавозкі пасажыраў, у першую чаргу дзяцей, і інш.

ДАІ Магілёва з 15 да 24 верасня таксама надасць павышаную ўвагу бяспецы ўразлівых удзельнікаў дарожнага руху. Звернуць увагу: ці ёсць у пешаходаў вечарам флікеры. Там нагадалі, што за парушэнне гэтага патрабавання пагражае штраф ад 1 базавай велічыні (37 рублёў) да 3 базавых (111 рублёў).

У Віцебскай вобласці таксама, для папярэджання траўматызму ўразлівых удзельнікаў дарожнага руху, з 15 да 24 верасня ДАІ правядзе «комплекс прафмерапрыемстваў», каб чарговым разам звярнуць увагу пешаходаў, веласіпедыстаў на неабходнасць захоўваць ПДР, а таксама абавязковага выкарыстання святлоадбіўных элементаў. На дарогах пройдуць рэйдавыя мерапрыемствы.