Пуцін даручыў чыноўнікам зразумець, чаму абрынуўся рубель

Расейскі рубель увайшоў у топ найслабейшых валют свету.

Неабходна дакладна зразумець, чаму адбылося паслабленне рубля, заявіў прэзідэнт Расеі Уладзімір Пуцін на нарадзе з членамі ўрада ў панядзелак.

Сітуацыя на валютным рынку стала «галоўным фактарам» паскарэння інфляцыі, а гэта цяпер «адна з асноўных праблем», сказаў Пуцін, звяртаючыся па відэасувязі да прэм'ера Міхаіла Мішусціна і міністраў эканамічнага блока.

Трэба «своечасова, не адкладаючы, прымаць адпаведныя пастановы», заявіў прэзідэнт РФ, не ўдакладніўшы, якія пастановы мае на ўвазе.

З пачатку 2023 года даляр на Маскоўскай біржы падаражэў на 32%, ці 24 рублі, а еўра — на 37%, ці 28 рублёў. У сярэдзіне жніўня курсы паднімаліся вышэй за 100 рублёў за даляр і 110 рублёў за еўра, пасля чаго ЦБ РФ на экстраным пасяджэнні павысіў ключавую стаўку з 8,5% да 12%, а затым давёў яе да 13% і запатрабаваў ад экспарцёраў прадаваць больш валюты на рынку.

Рубель увайшоў у топ найслабейшых валют свету, а па працягласці ўстойлівага падзення ўстанавіў рэкорд з 2014 года: з кастрычніка 2022 года курс даляра скончыў ростам 9 з 11 месяцаў. Як вынік: інфляцыя, паводле звестак Расстата, з 2,3% у красавіку паскорылася да 5,5% на сярэдзіну верасня, а да канца года, паводле прагнозу ЦБ РФ, дасягне 7,5%.

Нягледзячы на гэта, цяперашняя эканамічная сітуацыя агулам устойлівая і збалансаваная, заявіў Пуцін, звяртаючыся да міністраў. «Мы вытрымалі абсалютна беспрэцэдэнтны замежны націск, санкцыйны націск некаторых кіроўных эліт у так званым заходнім блоку - некаторых кіроўных эліт у асобных краінах, якія мы называем недружалюбнымі», - падкрэсліў прэзідэнт.

Ён дадаў, што рост ВУП за год можа скласці 2,8%, хоць яшчэ ў красавіку чакалася толькі 1,2%, а нафтагазавыя даходы бюджэту «аднавіліся прыблізна да ўзроўню мінулага года».