Кітай манапалізаваў расейскі рынак імпартных аўтамабіляў

Доля кітайскіх аўтамабіляў у расейскім імпарце дасягнула 92%.

Доля кітайскіх аўтамабіляў у расейскім імпарце дасягнула 92% за 8 месяцаў 2023 года, заявіў часовы выканаўца абавязкаў кіраўніка Федэральнай мытнай службы (ФМС) Руслан Давыдаў у інтэрв'ю РІА «Новости».

З яго слоў, гандаль з Кітаем «вырас вельмі моцна», а доля Еўразвязу ў тавараабарачэнні Расеі працягвае падаць. «Гэта было прадказальна. <…> Еўропа закрылася ў гэтым плане, яна перастала прадаваць», - растлумачыў Давыдаў.

У канцы чэрвеня ён адзначаў, што пастаўкі легкавых аўтамабіляў з Кітая выраслі ўтрая. Згодна з ацэнкай галоўнай мытнай управы КНР, за першыя шэсць месяцаў гэтага года аб'ём такога экспарту ў Расею склаў $4,6 млрд (326 тысяч штук). Гэта на 543% вышэй, чым за аналагічны перыяд 2022 года.

Пасля пачатку вайны ва Украіне ўсе сусветныя аўтаканцэрны спынілі вытворчасць у Расеі. Пасля большасць з іх прадалі актывы і сышлі з краіны. Акрамя таго, спыніліся афіцыйныя пастаўкі новых аўто.

Кітайскія аўтамабілі засталіся фактычна адзінай альтэрнатывай айчынным маркам. Прэзідэнт «Аўтаваза» Максім Сакалоў называў рост долі гэтых аўтамабіляў на рынку стратэгічным выклікам для расейскага аўтапрама. Яны ўжо могуць непасрэдна ўплываць на коштаўтварэнне і пачынаюць перапісваць кошты, адзначаў гендырэктар «Аўтадома Падпіскі» Максім Шышко.

Раней паведамлялася, што расейскія банкі пачалі выдаваць да паловы аўтакрэдытаў на набыццё кітайскіх аўтамабіляў. За шэсць месяцаў 2023 года адзін толькі ЗГБ выдзеліў амаль 7 тысяч такіх пазык на 12,5 млрд рублёў.

Паводле звестак «Аўтастата», на 1 ліпеня гэтага года ў Расеі налічвалася блізу 1,08 млн кітайскіх аўто. Пры гэтым, як паказала апытанне «Адкрыццё Аўта», расейскія аўтааматары расчараваліся ў якасці аўтамабіляў з Паднябеснай. Напрыклад, 61% грамадзян заявілі, што аўтамабілі з Кітая толькі часткова адаптаваныя пад варункі надвор'я краіны, яшчэ 19% адзначылі, што расейскай зімы яны не вытрымліваюць.