Пра аўтахлам на вуліцах Менска цяпер можна паведамляць онлайн

Як гэта зрабіць.

У менчукоў з'явілася магчымасць паведамляць пра аўтахлам анлайн, расказалі ў сталічнай ДАІ.

Каб праінфармаваць інспекцыю пра неэксплутаваны транспарт, неабходна ў чат-бот @Pomoghet_bot адправіць паведамленне з указаннем адрасу стаянкі такога МС і ягонае фота. Паводле ўсіх фактаў правядуць праверку і ўжывуць захады ў адпаведнасці з заканадаўствам, запэўнілі ва ўстанове.

Пад неэксплутаваным транспартным сродкам разумеецца:

– МС, на якім адсутнічаюць элементы, прадугледжаныя ягонай канструкцыяй (шкло салона, колы, часткі кузава), а роўна маецца іх дэфармацыя або вонкава бачныя пашкоджанні, пры наяўнасці якіх забараняецца ягоны ўдзел у дарожным руху і выключаецца магчымасць ягонай эксплуатацыі;

– МС, які не эксплуатуецца больш за шэсць месяцаў з дня заканчэння тэрміну дзеяння дазволу на допуск транспартнага сродку да ўдзелу ў дарожным руху і не падтрымліваецца ў належным стане, які дапускае магчымасць ягонага ўдзелу ў дарожным руху і эксплуатацыі.

Дарэчы, праз названы чат-бот можна таксама паведамляць пра праблемныя адрэзкі на вулічна-дарожнай сетцы горада.

Нагадаем таксама, што, згодна з п. 143 ПДР, прыпынак і стаянка транспартных сродкаў забараняюцца:

– на газонах і іншых месцах з зялёнымі насаджэннямі;

– на праездах у дварах з боку, прылеглага да жылой забудовы;

– у месцах, дзе транспартны сродак створыць перашкоду для руху, працы транспартных сродкаў аператыўнага прызначэння і транспартных сродкаў дарожна-эксплуатацыйнай і камунальнай службаў (уезды ў двары і выезды з іх, праезды ў арках, вузкія мясцовыя праезды, месцы размяшчэння кантэйнераў для збору бытавых адкідаў і інш.);

– на адлегласці бліжэй за 10 метраў ад службовых дзвярэй крамаў, праз якія вырабляюцца пагрузачна-разгрузачныя працы, зачыненых брамаў, у тым ліку брамаў гаражоў.