Расейцы КАБам разбурылі шматпавярховік у Харкаве

Загінула дзіця, дзясяткі чалавек пацярпелі.

Войскі Расеі вечарам у сераду, 30 кастрычніка, ударылі авіябомбай па Салтоўскаму раёну Харкава і трапілі ў шматпавярховы дом, разбурыўшы ў ім амаль увесь пад'езд. Загінула дзіця, 34 чалавекі пацярпелі.

Пра гэта паведаміў мэр Харкава Ігар Церахаў у Telegram. Выбух у горадзе прагрымеў блізу 22.40. На месца выехалі профільныя службы, там успыхнуў пажар, піша «Обозреватель».

«Цалкам разбураныя паверхі з 6-га да першага 9-павярховага дома. Пад заваламі яшчэ могуць быць людзі», - напісаў гарадскі галава.

Паводле папярэдніх звестак, для ўдару вораг выкарыстаў ФАБ-500.

Кіраўнік Харкаўскай абласной ваеннай адміністрацыі Алег Сінягубаў удакладніў, што зафіксавана траплянне ў чацвёрты паверх шматпавярхоўкі. Пад заваламі могуць знаходзіцца людзі. У выніку трапляння разбураны амаль увесь пад'езд дома, пашкоджаныя цывільныя аўтамабілі.

Двое параненых знаходзяцца ў цяжкім стане. Восем - у сярэднім, астатнія атрымалі лёгкія раненні. Сама меней тры чалавекі знаходзяцца пад заваламі, папярэдне, сярод іх - жанчына і дзіця. Іх спрабуюць дэблакаваць ратавальнікі.

Дзіця, якое загінула ў выніку трапляння, дасталі з-пад завалаў з цяжкай траўмай галавы, пераломамі, без прыкметаў жыцця, распавёў дырэктар абласнога цэнтра экстраннай меддапамогі Віктар Забашта.

Рэанімацыйныя мерапрыемствы праводзіліся цягам 40 хвілін. Гэта хлопчык 11 год.

Дырэктар гарадскога дэпартамента па надзвычайных сітуацыях Багдан Гладкіх а 03:00 паведаміў, што пад заваламі разбуранага расейскай авіябомбай шматпавярховіка знойдзеныя фрагменты цела. Колькасць загінулых павялічылася да двух чалавек.

Колькасць пацярпелых павялічылася да 33.

На ўдар Расеі па шматпавярховіку ў Харкаве адрэагаваў прэзідэнт Украіны Уладзімір Зяленскі.

«Партнёры бачаць, што кожны дзень адбываецца. І ў гэтых умовах кожная іх адкладзеная пастанова - гэта сама меней дзясяткі, а то і сотні такіх расейскіх бомбаў супраць Украіны. Іх пастановы - жыццё нашых людзей. Таму мы разам павінны спыніць Расею і зрабіць гэта з усёй магчымай сілай», - заўважыў ён.

На 05:35, паводле звестак ДСНС, на месцы ўдару былі выратаваныя тры чалавекі.

«Разбураны пад'езд дзевяціпавярховага дома з пятага па першы паверхі. Пад заваламі, напэўна, застаюцца людзі. Аварыйна-выратавальныя работы працягваюцца», - падкрэслілі ратавальнікі.

Кіраўнік АВА Алег Сінягубаў раніцай дадаў, што пацярпелых 34. Паводле ўдакладненых звестак, загінуламу хлопчыку ў верасні споўнілася 12 гадоў. Акрамя таго, пад заваламі знаходзіцца яшчэ адзін 15-гадовы хлопчык.

«Знойдзеныя фрагменты цела ўжо папярэдне ідэнтыфікаванай асобы. Выратавальная аперацыя працягваецца. Пошукі ўскладняюцца значнай пашкоджанасцю канструкцыі дома і пагрозай падзення», - паведаміў ён.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com