«Лукашэнка спалохаўся расколу эліт»
46- 21.02.2024, 13:53
- 32,712
Унутры сістэмы нарастаюць супярэчнасці.
Аляксандр Лукашэнка 20 лютага выступіў перад кіраўніцтвам дзяржаўных органаў сістэмы нацыянальнай бяспекі, агучыў "пагрозы Польшчы" (з боку польскай і амерыканскай выведак) і беларускім чыноўнікам (з боку польскай выведкі).
«Белсат» спытаў у палітолага Валерыя Карбалевіча, што гэта значыць.
Паводле слоў Лукашэнкі, "уцекачы і іх заходнія куратары" рыхтуюць ці то дзяржаўны пераварот і гвалтоўны захоп улады, ці то рэпетыцыю перавароту падчас прэзідэнцкіх "выбараў" 2025 года, ці то "інструменты мяккай сілы на выпадак няўдачы першых двух сцэнарыяў".
Сярод іншага ён агучыў пагрозы і Польшчы, і сваім чыноўнікам. Як перадае БелТА, Лукашэнка казаў, што атрымаў аператыўную інфармацыю, нібыта польская і амерыканская выведкі "рыхтуюць маштабную правакацыю супраць цывільнага насельніцтва Польшчы", у якой абвінавацяць Расею і Беларусь.
Палітычны аглядальнік “Радыё Свабода” Валер Карбалевіч нагадвае “Белсату”: Лукашэнка рэгулярна выступае з канспіралагічнымі тэорыямі, абвінавачваючы Захад.
"Можна, вядома, прыдумляць розныя версіі, але самая простая і самая, як мне здаецца, блізкая да рэальнасці версія - што за гэтымі словамі проста нічога няма ", - мяркуе Карбалевіч.
Са слоў Карбалевіча, Лукашэнка "даўно не адказвае за свае словы".
Лукашэнка можа казаць усялякія рэчы, нягледзячы на тое, як яны суадносяцца з рэальнасцю. Лукашэнка спасылаецца на "закрытую інфармацыю", якую немагчыма ні пацвердзіць, ні зняпраўдзіць, а гэта тыповая прыкмета канспіралогіі.
Тым больш Польшча, як кажа Карбалевіч, гэта "экзістэнцыйны вораг Лукашэнкі". Галоўных ворагаў зараз, з пункту гледжання Лукашэнкі, тры: Злучаныя Штаты Амерыкі, Польшча і Украіна. Казаць, што ЗША збіраецца напасці на Беларусь, цяжкавата, а Польшча - вось жа яна побач! Ды і нядаўна Лукашэнка расказваў, што “Польшча збіраецца захапіць заходнюю частку Беларусі”, нібыта нават “абмяркоўвала гэта з лідарамі апазіцыі ў абмен на заходнія землі Расеі”.
Акрамя таго, словы Лукашэнкі сведчаць, што ён баіцца расколу эліт. Лукашэнка бачыць, што ўсё ж нейкія канфлікты, нейкія супярэчнасці нарастаюць унутры сістэмы.
"Як вось тое, што ён распавядае, што апазіцыя нібыта рыхтуецца пад выбары ажыццявіць бунт, дзяржаўны пераварот… Ну, як гэта каментаваць?" - пытаецца Карбалевіч.
Але што магло быць нагодай для такіх выказванняў, штуршком? Карбалевіч разважае: нараду ж, сабраліся вайскоўцы і людзі з пагонамі, трэба нагнятаць напружанасць, напалохаць людзей і мабілізаваць іх на абарону.
Палітычны аглядальнік называе гэты выступ Лукашэнкі “апакаліптычным”: Лукашэнка разважаў, што “вось-вось вайна”, “вайна непазбежная”, “трэба рыхтавацца да вайны”… І каб пераканаць публіку ў гэтым, трэба казаць не пра абстрактныя пагрозы, а прыводзіць факты. Лукашэнка прывёў, толькі адкуль ён гэта ўзяў, не кажа - і не адказвае за свае словы.