МЗС Літвы аб адпраўцы заходніх войскаў ва Украіну: Ініцыятыва заслугоўвае ўвагі

Сітуацыя патрабуе палітычнага лідарства, амбіцый і смеласці думаць нестандартна.

Ініцыятыва аб магчымасці размяшчэння заходніх наземных войскаў ва Украіне - заслугоўвае ўвагі.

Пра гэта паведамляе РБК-Украіна са спасылкай на Twitter-старонку міністра замежных спраў Літвы Габрыэлюса Ландсбэргіса.

«Лёс Еўропы вызначаецца на палях бітваў ва Украіне. Такія часы патрабуюць палітычнага лідарства, амбіцый і смеласці думаць нестандартна. Ініцыятыва, якая стаяла за ўчорашняй сустрэчай у Парыжы, заслугоўвае ўвагі», - напісаў кіраўнік Міністэрства замежных спраў Літвы.

Размяшчэнне заходніх войскаў ва Украіне

26 лютага ў Елісейскім палацы ў Парыжы адбылася працоўная сустрэча блізу 20 еўрапейскіх лідараў. Удзельнікі канферэнцыі абмеркавалі спосабы супрацьстаяння Расеі і магчымыя шляхі дапамогі Украіне ў супрацьстаянні агрэсару ў кантэксце абвастрэння сітуацыі на фронце за апошнія тыдні.

Падчас саміту прэзідэнт Францыі Эмануэль Макрон не выключыў, што NАТО ўвядзе войскі для дапамогі Украіне. Галоўная праблема, паводле ягоных слоў, у тым, што цяпер адсутнічае кансэнсус у гэтым пытанні.