«Не здавайцеся!»: Ала Пугачова звярнулася да расейцаў

Заява была зробленая на фоне развітання з Навальным.

Ала Пугачова ў Інстаграме апублікавала допіс з заклікам не здавацца. Расейцы ўбачылі ў гэтым дасылку да слоў Аляксея Навальнага.

«Першая нядзеля ВЯСНЫ. Свята жоўтых кветак. НЕ ЗДАВАЙЦЕСЯ! НЕ засмучайцеся! МІР ВАШАМУ ДОМУ!», - гаворыцца ў тэксце.

Спявачка не згадала прозвішча Навальнага, але каментатары выказалі здагадку, што гэта звязанае з забойствам і пахаваннем палітыка.

«Не здавайцеся! Адна фраза, Ала Барысаўна, і мы ўсё зразумелі. Дзякуй, што засталіся Чалавекам!», - напісаў адзін з падпісантаў спявачкі.

У дакументальным фільме «Навальны» канадскага рэжысёра Дэніэла Роэра палітык заклікаў расейцаў не здавацца, калі яго заб'юць:

«Маё пасланне на выпадак, калі мяне заб'юць, вельмі простае: не здавайцеся!», - сказаў тады апазіцыянер.