Прысвоеную рэжымам Лукашэнкі сонечную электрастанцыю хочуць прадаць за $25 мільёнаў

Брытанскі інвестар патрабуе кампенсаваць яму суму на парадак большую.

Сонечную электрастанцыю, якая належала брытанцам, выставілі на аўкцыён. Стартавы кошт – Br79,5 млн (у пераліку – амаль $25 млн). Аб'ект прадаюць з прычыны запазычанасці былога ўласніка – прыватнай кампаніі «Салар Лэнд». У апісанні лота пазначана, што «працаздольнасць абсталявання не правяралася».

Гэтая электрастанцыя знаходзіцца ў Чэрыкаўскім раёне на Магілёўшчыне. У апісанні лота пазначаныя ўласна сонечныя панэлі, а таксама капітальны будынак і мноства ўсякага абсталявання, у тым ліку метэастанцыя і сістэма відэаназірання.

Патэнцыйных пакупнікоў папярэджваюць, што «працаздольнасць абсталявання не правяралася» і што «не пацверджанае ўзнаўленне якасці электраэнэргіі, якую вырабляе станцыя».

«Аб'ект адлучаны ад дзяржаўнай энэргетычнай сеткі 07.05.2020. Непасрэднага падлучэння станцыі да электрычных сетак энэргазабеспячальнай арганізацыі няма ў сувязі з прызнаннем несапраўднай рэгістрацыі збудаваных даўжніком аб'ектаў электрасеткавай інфраструктуры», – адзначаецца ў аб'яве.

Акрамя таго, арганізатары гандлю нагадваюць, што сонечныя панэлі нельга вывезці за мяжу. Гэта прадугледжана пастановай ураду, ухваленай у верасні летась.

Энэргааб'ектам валодала прыватная кампанія з брытанскім капіталам «Салар Лэнд». На момант запуску ў 2021 годзе гэта была самая магутная сонечная электрастанцыя ў Беларусі.

У студзені сёлета стала вядома, што эканамічны суд Магілёўскай вобласці нацыяналізаваў станцыю з прычыны запазычанасці кампаніі-ўласніцы на Br15, 8 млн. Гэтая пазыка ўзнікла, калі дзяржава знізіла тарыф, паводле якога набывала электраэнэргію, і запатрабавала вярнуць нібыта пераплачанае.

Летась стала вядома, што грамадзянін Вялікай Брытаніі Кіабод Тутанян Машад, які інвеставаў у «Салар Лэнд», патрабуе ад уладаў Беларусі кампенсаваць яму сотні мільёнаў даляраў. Ён падаў адпаведнае апавяшчэнне аб спрэчцы 26 ліпеня 2023 года.

Пазней «Салар Лэнд» закідалі іншымі судовымі пазовамі.