Польшча збіраецца затапіць частку мяжы з Беларуссю

Праз напады нелегалаў.

Прэм'ер-міністр Польшчы Дональд Туск расказаў аб будаўніцтве сістэмы ўмацаванняў на мяжы з Беларуссю і Расеяй, якая будзе ўключаць сховішчы, лясныя насаджэнні і затопленыя адцінкі.

У эфіры тэлеканала TVN24 ён удакладніў, што размова ідзе пра 400 кіламетраў на ўсходняй адміністрацыйнай мяжы. Паводле ягоных слоў, гэта неабходна для ўзмацнення бяспекі, паколькі РБ і РФ працягваюць арганізоўваць гібрыдныя атакі на мяжы з дапамогай нелегальных мігрантаў.

"Я атрымліваю штодзённыя паведамленні - часам два ці тры разы на дзень - аб новых групах, арганізаваных Аляксандрам Лукашэнкам, якія хочуць перасекчы польскую мяжу агрэсіўным спосабам", - сказаў ён.

Кіраўнік польскага ўрада дадаў, што для "аднаўлення пачуцця бяспекі" на ўсходняй мяжы пабудуюць адпаведныя ўмацаванні і інфраструктуру, а шэраг тэрыторый давядзецца затапіць.

Папярэдні ўрад пабудаваў агароджу на польска-беларускай мяжы працягласцю больш за 180 км і вышынёй 5,5 метраў для абароны ад нелегальнай міграцыі. Яго дапаўняе сістэма камер і датчыкаў, якія будуць сачыць за адміністрацыйнай мяжой.

Нагадаем, памежная зона стала крыніцай напружання з 2021 года, калі Беларусь перапраўляла мігрантаў з Блізкага Усходу і Афрыкі ў Польшчу і краіны Балтыі. Улады ЕЗ заявілі, што гэта было зроблена з мэтай стварэння хаосу і дэстабілізацыі рэгіёна. Заходнія чыноўнікі заклікалі Менск вывесці ўсіх нелегальных мігрантаў з памежных тэрыторый і вярнуць іх у краіны, з якіх яны прыбылі.

У сярэдзіне жніўня 2023-га года Літва пастанавіла закрыць два з шасці пунктаў пропуску на мяжы з Беларуссю, а Латвія абвясціла аб мабілізацыі дадатковых супрацоўнікаў памежнай службы "ў сувязі з гібрыднай пагрозай, якая хутка расце на латвійска-беларускай дзяржаўнай мяжы". "Мы гатовы дзейнічаць аднастайна, каб прыйсці на дапамогу, прымаць пастановы - уключаючы закрыццё мяжы", - заявіла міністарка унутраных спраў Літвы Агне Білатайтэ.