Літва будуе на мяжы з Беларуссю мястэчка для вайскоўцаў з Нямеччыны

У вайсковым гарадку размесцяць пяць тысяч чалавек.

Літва будуе мястэчка для нямецкіх вайскоўцаў на мяжы з Беларуссю. Пра гэта паведамляе Delfi.

Цяпер рыхтуюць пляцоўку для будаўніцтва, яна знаходзіцца недалёка ад вёскі Руднінкай (раён Салечнікі) побач з літоўска-беларускай мяжой. Усю інфраструктуру і палігоны на плошчы дзясяткі гектараў плануюць закончыць да канца 2027 года.

"Гэта можна называць вайсковым гарадком, паколькі яго насельніцтва будзе ў дзесяць разоў большае, чым у Руднінкаі, дзе пражывае блізу паўтысячы чалавек", - распавёў камандзір Цэнтрам баявой падрыхтоўкі імя генерала Раманаўскаса палкоўнік Рымантас Ярмалавічус. Ён напярэдадні правёў экскурсію для журналістаў.

На 40 гектарах размесцяцца казармы і шматфункцыянальныя будынкі. Па другі бок дарогі ад мястэчка абсталююць гелікаптэрную пляцоўку.

На гэты момант на пляцоўцы ўжо высеклі лес, на гэта спатрэбілася тры месяцы. Далей будуць праводзіць размінаванне тэрыторыі, якую СССР выкарыстаў для выпрабаванняў авіябомбаў падчас халоднай вайны. Тэндар на гэтыя працы здабыла брытанская кампанія, чые спецыялісты праводзяць расчыстку, а літоўцы пасля іх правяраюць, наколькі добра ўсё выканана.

У літоўскім войску чакаюць, што найбліжэйшыя два месяцы будзе падпісаны кантракт на будаўніцтва казармаў і іншых аб'ектаў інфраструктуры, напрыклад, спартзал. Таксама туды будуць пракладаць вода-і электразабеспячэнне. Асноўную частку работ плануюць закончыць у 2025 годзе.