Палітолаг: Гэта поўныя «Прыгоды Чыпаліна»

Чаму лукашысты жадаюць змяніць закон аб зваротах грамадзян.

Лукашэнкаўская прапаганда назвала прычыну адтоку медыкаў. На тэлеканале ОНТ заявілі, што яна палягае ў тым, што лекары «стала вымушаныя перад кімсьці апраўдвацца» і «без малога кожны дзень» тлумачыць пацыентам, «як яны лечаць і ці правільна яны гэта робяць».

Адток лекараў з Беларусі нібыта не звязаны ні з палітыкай, ні з заробкамі, а з няўдзячнымі пацыентамі. Такую выснову прапагандыст зрабіў пасля размоў з «вельмі многімі» ананімнымі крыніцамі «ад галоўнага лекара да медсясцёр».

«Филин» спытаў палітолага Анатоля Котава аб тым, чаму прапагандыст прапанаваў перагледзець закон аб зваротах грамадзян:

- Калі прапагандыста паслухаюць і пачнуць карэктаваць закон, то гэта прывядзе да таго, што ўжо, хутчэй за ўсё, на заканадаўчым узроўні будзе запісана значна больш выпадкаў, калі грамадзянам можна не адказваць, ігнараваць. Больш дыскрэцыйных паўнамоцтваў канкрэтнаму чыноўніку, каб проста напісаць адпіску.

Таму што нельга напісаць агульнае правіла: вось на такое мы рэагуем цягам 15 дзён, а 10 старонак прысвяціць выняткам для медыцыны, бо «праз вашыя звароты з'язджаюць лекары».

Калі карэкціроўка будзе, яна будзе датычыцца ўсяго. У існай сітуацыі можна з абсалютнай упэўненасцю казаць аб тым, што ў выніку карэкціроўкі чыноўнік стане яшчэ далей ад народа, чым ён быў да гэтага.

- Ці прывядзе гэта да таго, што ў людзей будзе менш опцый паскардзіцца?

- Пісаць можна будзе столькі ж, колькі і раней, калі не ўвядуць штраф за неабгрунтаваны зварот грамадзяніна. Адзіная навэла, якой варта баяцца, - гэта поўныя «Прыгоды Чыпаліна». Гэта значыць, не пішыце нам, мы вас аштрафуем за ўсякі зварот.

З чыноўніцкай логікі бракуе штрафаў за звароты грамадзян, якія можна прызнаць неабгрунтаванымі. І тады будзе бранябойная пліта, якую не прабіць.