«Так рабіў Гітлер»: Зяленскі раскрыў расейскую тактыку «дывановых» бамбаванняў

Расея выкарыстоўвае за месяц да 3500 КАБаў для ўдараў выключна па цывільным насельніцтве.

Расея штомесяц выпускае выключна па цывільным насельніцтве і інфраструктуры Украіны 3200-3500 кіраваных авіяцыйных бомбаў (КАБ).

Пра гэта заявіў прэзідэнт Украіны Уладзімір Зяленскі ў інтэрв'ю італьянскаму тэлеканалу Sky TG24. Паводле ягоных слоў, акупанты мэтанакіравана б'юць па цывільных, каб запалохаць.

«Расея выкарыстоўвае на месяц 3200-3500 КАБаў выключна па цывільным насельніцтве, цывільнай інфраструктуры... Яны выкарыстоўваюць тысячы гэтых бомбаў, каб людзі баяліся і людзі ўцякалі з таго ці іншага горада, з таго ці іншага абшару, а Расея мела магчымасць акупаваць гэтыя вёскі і гарады. І гэта галоўная мэта. Гэтак жа, як рабіў Гітлер, - «дывановае» бамбаванне - усё тое ж самае, як адна метадычка», - сказаў Зяленскі.

Ён адзначыў, што аперацыя дыктатара Уладзіміра Пуціна для захопу Харкава правалілася. Украінскія ваяры стабілізавалі сітуацыю ў рэгіёне. Зяленскі дадаў, што Украіна 8 месяцаў чакала прыняцця вялікага пакета дапамогі ад ЗША. За гэты час Расея так і не змагла захапіць Харкаў.