Літва фіксуе падвышаную актыўнасць расейскай авіяцыі

Ужо другі тыдзень.

Міністэрства абароны Літвы ўжо другі тыдзень фіксуе падвышаную актыўнасць расейскай авіяцыі ў Балтыйскім рэгіёне. Пра гэта паведамляе "Еўрапейская праўда" са спасылкай на LRT.

У літоўскім абаронным ведамстве гэтую актыўнасць звязваюць з вайсковымі вучэннямі NАТО ў Літве і Балтыйскім моры.

- Актыўнасць расейскіх самалётаў у рэгіёне можа быць звязаная з міжнароднымі вучэннямі BALTOPS, "Жалезны воўк 2024-1", якія зараз праходзяць у Балтыйскім рэгіёне, - адзначылі ў Мінабароны Літвы.

Са звестак літоўскага Мінабароны, на мінулым тыдні знішчальнікі NАТО, якія ажыццяўляюць місію паветранай паліцыі ў краінах Балтыі, здзейснілі 11 вылетаў для выяўлення і суправаджэння расейскіх самалётаў, якія парушылі правілы палётаў у міжнароднай паветранай прасторы над Балтыйскім морам.

Усяго было выяўлена і праведзена сем тактычных бамбавікоў Су-24, пяць знішчальнікаў Су-27, чатыры знішчальнікі Су-30, два знішчальнікі-бамбавікі Су-34, чатыры самалёты-выведчыкі Іл-20, два самалёты-выведчыкі і аэракартографа Ан-30, а таксама адзін раз пасажырскі самалёт Іл-96.

Большасць з гэтых самалётаў ляцелі без планаў палётаў, з адключанымі радыёлакацыйнымі транспондэрамі і без радыёсувязі з Рэгіянальным цэнтрам кіравання палётамі.

Большасць з іх узляцелі з Калінінградскай вобласці ў міжнароднай паветранай прасторы і здзейснілі пасадку там жа, у Калінінградскай вобласці.

На пазамінулым тыдні паветраная паліцыя NАТО ў Літве таксама ажыццявіла 11 вылетаў для ідэнтыфікацыі і суправаджэння расейскіх самалётаў, якія ляцелі ў міжнароднай паветранай прасторы.

Звычайна за тыдзень фіксуецца толькі адзінкавыя такія выпадкі.

Зараз у Балтыйскім моры праходзяць найбуйнейшыя на сённяшні дзень вайсковыя вучэнні BALTOPS'24, у якіх бяруць удзел блізу дзевяці тысяч вайскоўцаў і іншага персаналу, больш за 50 караблёў і больш за 80 самалётаў з 20 краін NАТО.

На мінулым тыдні Фінляндыя заявіла, што ў панядзелак расейскі вайсковы самалёт парушыў яе паветраную прастору - гэта стала першым падобным выпадкам з моманту ўступлення краіны ў NАТО летась.

Неўзабаве фінскія ўлады ўдакладнілі, што паветраную прастору краіны парушылі не адзін, а чатыры расейскія вайсковыя самалёты.

Раней паведамлялася, што колькасць вылетаў знішчальнікаў NАТО на перахоп расейскіх самалётаў, якія набліжаюцца да паветранай прасторы Альянсу над рэгіёнам Балтыйскага мора, вырасла на 20-25% у першым квартале 2024 года.