ISW: Пуцін шукае «выключны выпадак» для ядзернага ўдару па Украіне

Што можа стаць нагодай?

Прэзідэнт РФ Уладзімір Пуцін прадаўжае агучваць ядзерныя пагрозы ў межах расейскай інфармацыйнай кампаніі, якая закліканая спыніць заходнюю падтрымку Украіны. Пра гэта піша «Інстытут вывучэння вайны» ў зводцы ад 21 чэрвеня.

У РФ спрабуюць падарваць намаганні міжнароднай супольнасці ва ўзгадненні стратэгічнай візіі, каб спыніць захопніцкую вайну Расеі супраць Украіны. У ходзе выступу перад расейскімі выпускнікамі ваенных вучылішчаў 21 чэрвеня Пуцін заявіў, што РФ плануе і ў будучым развіваць ядзерную трыяду ў якасці «гарантыі стратэгічнага стрымлівання» і падтрымкі балансу сілаў у свеце. Паводле словаў Пуціна, у РФ таксама працуюць над павелічэннем канвенцыйных баявых магчымасцяў і абароннай вытворчасці.

20 чэрвеня падчас прэс-канферэнцыі ў В'етнаме Пуцін заявіў, што Расея разглядае магчымасць «зніжэння парогу» выкарыстання ядзернай зброі ў сваёй ядзернай дактрыне і што магчымая будучая стратэгічная параза расейскіх войскаў ва Украіне прывядзе да «страты [расейскай] дзяржаўнасці».

Амерыканскія аналітыкі адзначаюць, што, паводле словаў Пуціна, параза РФ ва Украіне роўная экзістэнцыйнай пагрозе расейскай дзяржаве, – гэтая ўмова патрэбная, каб спаслацца на «выключны выпадак», пры якім расейская ядзерная дактрына дапускала б выкарыстанне ядзернай зброі.

Заява Пуціна ад 21 чэрвеня, мяркуючы з усяго, прадаўжае інфармацыйную аперацыю для падрыву намаганняў Захаду, накіраваных на стратэгічную мэту – катэгарычную паразу расейскіх сілаў. Так, мяркуюць на Захадзе, павінна скончыцца ваеннае становішча ва Украіне.

Аналітыкі ISW прытрымліваюцца думкі, што пагроза ядзернай эскалацыі – гэта галоўны сродак РФ, каб маніпуляваць заходнімі палітыкамі, якія прымаюць пастановы. Уяўляецца малаверагодным, што такое ядзернае стрымліванне ў сапраўднасці прывядзе да ядзернай эскалацыі.