У расейскім Уладзіміры машына без кіроўцы наехала на семярых дзяцей
- 12.08.2024, 21:25
- 15,406

Усе дзеці былі дастаўленыя ў лякарню.
Ва Уладзіміры аўтамабіль Chevrolet Lacetti, за стырном якога не было кіроўцы, здзейсніў наезд на некалькіх дзяцей. Пра гэта паведаміла прэс-служба рэгіянальнай управы МУС.
ДТЗ адбылося 12 жніўня на вуліцы Міру.
«Прыпаркаваны ў непасрэднай блізкасці ад ходнікаў аўтамабіль "Шэўрале Лачэці", без кіроўцы, з нявызначаных прычынаў пачаў самаадвольны рух, у выніку чаго адбыўся наезд на групу дзяцей 7–8 гадоў, якія знаходзіліся на ходніках», – гаворыцца ў паведамленні.
У выніку сямёра дзяцей былі дастаўленыя ў лякарню.
Паводле звестак Следчага камітэта, у момант аварыі дзеці накіроўваліся ў дзіцячы цэнтр і іх суправаджалі дарослыя. Следчыя распачалі працэсуальную праверку.