Экс-намеснік міністра абароны Польшчы заклікаў стварыць Беларускі легіён на тэрыторыі краіны

Польшча мае права ўдзельнічаць у паскарэнні падзення рэжыму Лукашэнкі.

У Польшчы ўжо дзейнічае Украінскі легіён. У яго рамках грамадзяне Украіны праходзяць ваенную падрыхтоўку перад тым, як заключыць кантракт з УСУ.

У сваім аналізе для выдання Wprost.pl стварэнне аналагічнага падраздзялення – Беларускага легіёну – прапануе экс-намеснік міністра абароны Польшчы і былы камандзір сухапутных войскаў, генерал-лейтэнант у адстаўцы Вальдэмар Скшыпчак.

«Мы не з'яўляемся непасрэднымі ўдзельнікамі вайны ва Украіне. Мы падтрымліваем суседа, які ваюе, у межах кааліцыі. Мы прапануем дапамогу, сярод іншага – навучаннем Украінскага легіёну. Чаму б не пачаць фармаванне Беларускага легіёну?» – пытае былы камандзір сухапутных войскаў.

Польскі генерал кажа, што ў Аляксандра Лукашэнкі «на руках кроў тысячаў нявінных». На ягоную думку, калі Пуцін паспрабуе спыніць ваенныя дзеянні ва Украіне, адной з умоваў уступлення ў перамовы з удзелам Захаду павінна стаць перадача беларускага дыктатара ў рукі міжнароднага трыбуналу.

«Польшча як дзяржава, на якую напала Беларусь, мае права ўдзельнічаць у звядзенні рахункаў з камандай забойцаў Лукашэнкі і, перш за ўсё, у паскарэнні падзення ягонага рэжыму», – зазначыў ён.

Адстаўны вайсковец адзначае, што авантурызм Лукашэнкі абумоўлены тым, што ЕЗ па-ранейшаму мала абмяжоўвае менскі рэжым. Таму ён заклікае Брусэль «зацягнуць пятлю на шыі беларускага дыктатара».

«Трэба сабраць сотні брусэльскіх чыноўнікаў і прывезці іх на нашую мяжу з Беларуссю. Можа быць, гэта заахвоціць іх задумацца пра бяспеку і будучыню Еўропы», – падкрэсліў Скшыпчак.

Генерал адзначае, што «колькасць грамадзянаў Беларусі, якія знаходзяцца ў вымушанай эміграцыі, вялікая».

«Ва Украіне ваюе полк Каліноўскага, набраны з беларусаў. Што перашкаджае ЕЗ пачаць ставіць перад Лукашэнкам дакладна вызначаныя ўмовы?» – пытаецца Вальдэмар Скшыпчак, заклікаючы «выставіць Менску рахунак за бандытызм».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com