СМІ: БПЛА, які падпаліў склад пад Таганрогам, выявіўся расейскім
3- 24.09.2024, 17:31
- 9,698
Яго «прызямліла» ўласная СПА.
СПА Расеі збіла над Таганрогам (Растоўская вобласць) беспілотнік, выклікаўшы гэтым пажар на складзе лесаматэрыялаў.
БПЛА выявіўся расейскім, піша «Дыялог.UA».
Кадры даступныя на Telegram-канале «Украіна 365».
Судзячы па фота абломкаў, расейскія вайскоўцы падбілі свой жа дрон-выведнік «Арыён» (вядомы таксама пад назвай «Іншаходзец»). Пасля падзення захавалася частка крыла з намаляванай на ім чырвонай зоркай.
Адзначым, што «Арыён» быў распрацаваны спецыяльна для патрэбы УС Расеі. Ён належыць да катэгорыі сярэднявысотных БПЛА з вялікай працягласцю палёту. Далёкасць палёту борта можа дасягаць 250 км. Развівае максімальную хуткасць 120-200 км/г, максімальная вышыня палёту 7,5 км.
РФ вельмі актыўна выкарыстоўвае «Арыёны» супраць Украіны, выкарыстоўваючы іх для выведкі і цэлеўказання. Кошт аднаго апарата можа дасягаць $10 млн.
У выніку падзення дрона на складзе ў прамзоне Таганрога ўзнік моцны пажар на плошчы 200 кв. м. Паводле інфармацыі губернатара вобласці, «агнём пашкоджаны дах будынка і 4 легкавыя аўтамабілі».
Расейскі Telegram-канал «ВЧК-ОГПУ», звязаны з расейскімі спецслужбамі, паведаміў, што робат рухнуў у выніку працы расейскай сістэмы супрацьпаветранай абароны. «На Таганрог была атака БПЛА, працавала СПА. Цяпер пажарныя змагаюцца з агнём», - напісаў рэсурс.