Расіяне масава пачалі эканоміць на ежы

З-за абвалу даходаў і росту цэн жыхары Расіі масава адмаўляюцца ад звыклых прадуктаў.

Расійскія спажыўцы пераходзяць на ашчадную мадэль паводзінаў і эканомяць, у тым ліку і на харчовых прадуктах, паведамілі «Коммерсанту» крыніцы на рынку рознічнага гандлю, у тым ліку ў федэральных гандлёвых сетках.

Паводле слоў аднаго з суразмоўцаў выдання, з-за «эканамічных рэалій» рытэйлеры адчуваюць праблемы з продажамі і вымушаныя стрымліваць цэны «на паліцы». Гэта, у сваю чаргу, вядзе да падзення рэнтабельнасці: сёлета ў найбуйнейшых рознічных сетак яна можа апусціцца да гістарычнага мінімуму — 1,7–1,9%, паводле прагнозу «Infoline-Аналитики».

«Сёння продажы ў штуках скарачаюцца», — пацвярджае праблемы на рынку прадуктаў харчавання Дзмітрый Вострыкаў, выканаўчы дырэктар асацыяцыі «Руспродсоюз», куды ўваходзяць больш за 450 вытворцаў і пастаўшчыкоў харчовых прадуктаў.

Каб зэканоміць на ежы, спажыўцы ўсё часцей заходзяць у хард-дыскантары, якія прадаюць самыя танныя тавары з максімальнымі зніжкамі. Выручка такіх крамаў («Светофор», «Чижик», «Доброцен») вырасла на 27% у параўнанні з мінулым годам — рэкордна сярод усіх харчовых рытэйлераў, паводле статыстыкі Infoline.

З-за інфляцыі, якая нават паводле афіцыйных дадзеных з пачатку вайны перавысіла 40%, дзве траціны спажыўцоў імкнуцца знаходзіць зніжкі і акцыі, а 58% свядома адмаўляюцца ад пэўных тавараў, якія набывалі раней, паказала даследаванне «Romir». Акрамя таго, 57% спрабуюць знаходзіць аналагі ў больш нізкіх цэнавых катэгорыях, а каля паловы выбіраюць для пакупак крамы нізкіх цэн або ўвогуле стараюцца радзей хадзіць па пакупкі.

У гэтай сітуацыі федэральныя гандлёвыя сеткі пачалі прапаноўваць пастаўшчыкам кампенсаваць недаатрыманы розніцай даход, піша «Коммерсант». Можа ісці пра неабходнасць пагадзіцца са штрафамі, знізіць цэны, прадаставіць зніжкі або правесці іншыя выплаты, адзначылі ў Палаце пастаўшчыкоў. Пры гэтым памер кампенсацый вагаецца ад аднаго да сотняў мільёнаў рублёў.

Старшыня прэзідыума АКОРТ Станіслаў Багданаў кажа, што пастаўшчыкі могуць адмовіцца ад патрабаванняў гандлёвых сетак, але для іх гэта пагражае скарачэннем асартыменту на паліцы або поўным разрывам адносін з рытэйлерам. «З улікам доляў лідараў рынку хутка знайсці альтэрнатыўныя шляхі продажу амаль немагчыма», — падкрэсліў крыніца «Коммерсанта» сярод пастаўшчыкоў.

Пры гэтым рытэйлеры часцей вядуць перамовы з пастаўшчыкамі тавараў з базавай спажывецкай карзіны, сказаў іншы суразмоўца «Ъ». Паводле яго слоў, калі тавар не забяспечвае мінімальную рэнтабельнасць, мэтазгоднасць яго прысутнасці на паліцы змяншаецца.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com