Армія Мадагаскара абвясціла пра захоп улады ў краіне

Прэзідэнт уцёк з краіны на фоне масавых пратэстаў.

На Мадагаскары вайскоўцы абвясцілі пра пераход дзяржаўнай улады ў краіне пад кантроль вайсковага савета, у склад якога ўвайшлі прадстаўнікі арміі, жандамерыі і нацыянальнай паліцыі. Гэта адбылося праз суткі пасля таго, як стала вядома пра ўцёкі прэзідэнта Мадагаскара Андры Радзуэліны за мяжу. «Мы ўзялі ўладу ў свае рукі», — заявіў па нацыянальным радыё ў аўторак, 14 кастрычніка, палкоўнік Майкл Рандрыянірына.

Дзеянне канстытуцыі прыпынена, усе дзяржаўныя інстытуты, за выключэннем ніжняй палаты парламента Мадагаскара (Нацыянальнай асамблеі), распушчаныя. За некалькі хвілін да абвяшчэння пра пераход улады ў рукі вайсковых дэпутаты прагаласавалі за адхіленне Радзуэліны ад пасады прэзідэнта краіны.

У вайсковы савет уключаныя таксама вайскоўцы элітнага падраздзялення CAPSAT, з дапамогай якога Андры Радзуэліна прыйшоў да ўлады ў выніку ваеннага перавароту ў 2009 годзе.

Напярэдадні стала вядома, што Радзуэліна на фоне масавых пратэстаў пакінуў краіну 12 кастрычніка на французскім ваенным самалёце. Як адзначае радыёстанцыя RFI, гэта было ўзгоднена з прэзідэнтам Францыі Эмануэлем Макронам.

Лідар апазіцыі ў парламенце Мадагаскара Сітэна Рандрыянасалоніаіка пацвердзіў, што прэзідэнт уцёк за мяжу. «Мы патэлефанавалі ў адміністрацыю прэзідэнта, і там пацвердзілі, што ён пакінуў краіну», — паведаміў апазіцыянер у размове з Reuters. Паводле яго слоў, кіраўнік дзяржавы вырашыў уцячы з краіны пасля таго, як падраздзяленні арміі перайшлі на бок пратэстоўцаў.

Сам Андры Радзуэліна ў звароце да нацыі, які трансляваўся ў сацыяльнай сетцы Facebook увечары 13 кастрычніка, заявіў, што адмаўляецца сыходзіць у адстаўку. Адначасова ён пацвердзіў, што пакінуў краіну, і растлумачыў гэтае рашэнне жаданнем абараніць сваё жыццё. Дзе менавіта ён знаходзіцца, Радзуэліна не паведаміў. Цяпер апазіцыя збірае подпісы дэпутатаў, каб ініцыяваць працэдуру імпічменту кіраўніка дзяржавы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com