Лукашэнка падлізваўся перад захавальнікам сваіх грошай

Ёсць падводная частка айсберга.

Палітычны аналітык інфармацыйнага агенцтва «Позірк» Аляксандр Класкоўскі у каментары «Філіну» распавёў пра візіт у Мінск султана Амана Хайсама бен Тарэк Аль Саіда.

Паведамляецца, што абмяркоўваўся «спектр пытанняў двухбаковага супрацоўніцтва» і «паглыбленне гандлёва-эканамічных адносін».

— Што на самой справе можа стаяць за гэтай сустрэчай?

— Лічу, асноўныя дамоўленасці гэтага візіту засталіся за кадрам. Ёсць падазрэнні, што гаворка пра бізнес-інтарэсы сям'і Лукашэнкі, — адзначае Класкоўскі. — На перамовах прысутнічаў старэйшы сын кіраўніка Віктар, які афіцыйна ніякіх дзяржаўных пасадаў не займае.

Тым часам відавочна, што Віктар Лукашэнка адыгрывае закулісную ролю ў кантактах з Аманам і іншымі аравійскімі манархіямі — ён часта туды лётае. Тут цяжка прывесці нейкія доказы, але ёсць факт: тавараабарот за мінулы год з Аманам склаў усяго пяць мільёнаў долараў, а гэта — капейкі.

Зразумела, што пры такім тавараабароце ладзіць сустрэчы з помпай — тут гульня свеч не вартая. Значыць, ёсць падводная частка айсберга.

Ходзяць размовы, што сям'я Лукашэнкі хавае на Аравійскім паўвостраве свае грошы. Вядома, не злавілі — не злодзей. Але калі ёсць лішкі сродкаў, то лагічна іх хаваць там, куды Захаду і Амерыцы цяжка дацягнуцца.

Акрамя таго, звяртае ўвагу палітычны аналітык, падчас сустрэчы была падпісаная дэкларацыя аб намерах пабудаваць у Беларусі яшчэ адзін цэлюлозна-кардонны камбінат.

— Гэта выклікае здзіўленне, бо падобнае прадпрыемства ёсць у Добрушы, ёсць камбінат у Светлагорску, які цяпер знаходзіцца ў крызісным стане. То бок кардон і так няма куды дзяваць, навошта яшчэ адно прадпрыемства?

Відаць, тут разважанне кшталту «раскруцім гэтага багатага манарха на грошы, галоўнае — іх распілаваць», а ці будзе гэтае прадпрыемства рэнтабельным, ці будзе попыт на прадукцыю — пра гэта не думаюць.

— Калі асноўная мэта такіх сустрэч — лабіраванне бізнес-інтарэсаў сям'і Лукашэнкі, дык навошта ладзіць афіцыйныя візыты з помпай? Такія размовы, напэўна, маглі б весціся і праз асабістыя кантакты.

— Гэта робіцца для піяру. Сапраўды, можна было б вырашаць гэтыя справы паціху. Яно так і робіцца, бо бізнес-джэт Лукашэнкі час ад часу лётае на Аравійскі паўвостраў. Так што закрытыя кантакты таксама ёсць.

Але для Лукашэнкі важна чарговы раз паказаць, што ніякай ізаляцыі ў яго няма. Ён вельмі задаволены гэтым візітам. Тут яшчэ само слоўка «султан», відаць, гучыць для яго вельмі прыцягальна.

Лукашэнка не можа абвясціць сябе султанам, хоць дэ-факта па многіх параметрах выйшаў на гэты тытул. І тое, што прыляцеў сам султан, вельмі яму лісьціць — ён нават праводзіў яго асабіста ў аэрапорце, хоць пратаколам гэта не прадугледжана. Было відаць, што Лукашэнка хоча дагадзіць гэтаму госцю.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com