Экс-камандзір палка Каліноўскага пакінуў пасаду

Ён заявіў, што падраздзяленне ўжо не з'яўляецца палком паводле колькасці.

Павал «Дзядзька» Шурмей пакінуў пасаду камандзіра палка Кастуся Каліноўскага (ПКК). У інтэрв'ю «Zerkalo» ён таксама прызнаў, што паводле колькасці байцоў падраздзяленне ўжо не адпавядае статусу палка.

Цяпер кіраванне фармаваннем перайшло да калегіяльнага органа — Рады камандзіраў, а сам Шурмей будзе займацца яго палітычным прадстаўніцтвам.

На пытанне, ці з'яўляецца ПКК палком паводле колькасці вайскоўцаў, якая можа складаць ад некалькіх сотняў да некалькіх тысяч чалавек, Павал Шурмей адказаў адмоўна.

— Адкажу: не. І, калі ўжо вяртацца да гісторыі, гэта (тое, што падраздзяленне назвалі палком. — Заўв. рэд.) была праца з разлікам на перспектыву. Ну як ёсць, так ёсць, — заявіў ён.

Павал Шурмей патлумачыў, што пакінуў пасаду камандзіра ў межах структуральных змяненняў. Цяпер кіраванне палком ажыццяўляе Рада камандзіраў, якая, паводле яго слоў, існавала і раней, але цяпер яе роля стала публічнай.

— Рада — гэта ўсе камандзіры баявых падраздзяленняў. Некаторыя з іх — ветэраны, якія ваююць з самага пачатку [ўварвання РФ], з 2022 года, — распавёў Шурмей.

Экс-камандзір таксама ўдакладніў, што сам у Раду не ўваходзіць, але выконвае ўсе яе рашэнні.

Па словах Шурмея, да кампетэнцыі Рады належаць грамадскія, адміністрацыйныя і лагістычныя пытанні, напрыклад, размеркаванне атрыманых рэсурсаў паміж падраздзяленнямі. Пры гэтым Рада камандзіраў не аддае баявыя загады — гэта застаецца ў вядзенні ўкраінскага вайсковага камандавання.

— Усе байцы ПКК — гэта байцы Сіл абароны Украіны. Зразумела, што мы ўсе служым у Інтэрнацыянальным легіёне Галоўнага ўпраўлення разведкі. І зразумела, што загад аддаецца камандзірам вайсковай часці, у якой мы служым, — патлумачыў Шурмей.

Ён патлумачыў, што цяпер будзе займацца палітычным прадстаўніцтвам палка.

— Я не сышоў у нікуды. Пачаў займацца іншым напрамкам працы, які нават Рада камандзіраў лічыць, магчыма, не менш важным, чым тая баявая праца, якую яны робяць. Гэта прадстаўляць увесь рух каліноўцаў. І ў тым выпадку, калі гэта неабходна, — палітычна, — распавёў Шурмей.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com