ЗША рыхтуюць ваенную аперацыю супраць сябра Лукашэнкі

На стале ў Трампа тры сцэнары.

Адміністрацыя прэзідэнта ЗША Дональда Трампа распрацавала шэраг агрэсіўных сцэнараў для звяржэння сябра беларускага дыктатара, прэзідэнта Венесуэлы Нікаласа Мадуры. Ваенныя планы ўключаюць авіяўдары, аперацыі спецназу дзеля яго захопу або ліквідацыі.

Як піша The New York Times са спасылкай на амерыканскіх чыноўнікаў, Трамп яшчэ не прыняў канчатковага рашэння. Яго ключавыя дарадцы настойваюць на сілавым сцэнары, а Міністэрства юстыцыі працуе над стварэннем юрыдычнага абгрунтавання, якое дазволіць дзейнічаць у абыход Кангрэса.

Ключавымі прыхільнікамі ваеннага ўмяшання з'яўляюцца дзяржсакратар Марко Рубіё (які таксама выконвае абавязкі дарадцы па нацыянальнай бяспецы) і намеснік кіраўніка адміністрацыі Трампа Стывен Мілер. Яны лічаць, што звяржэнне венесуэльскага лідара з'яўляецца прыярытэтнай задачай.

Сам Трамп дагэтуль вагаецца, баючыся, што аперацыя можа праваліцца і ператварыцца ў «ганебнае паражэнне». Аднак яго галоўнай матывацыяй з'яўляецца патэнцыйная выгада для ЗША, а менавіта — атрыманне кантролю над велізарнымі запасамі нафты Венесуэлы, якія з'яўляюцца найбольшымі ў свеце.

Падрыхтоўка да магчымай ваеннай аперацыі ўжо вядзецца

З канца жніўня ЗША паслядоўна нарошчваюць ваенную прысутнасць у Карыбскім басейне. У рэгіёне ўжо знаходзіцца каля 10 тысяч амерыканскіх вайскоўцаў.

Чакаецца, што ў сярэдзіне месяца туды прыбудзе найноўшы і найбуйнейшы авіяносец ЗША Gerald R. Ford з 5 тысячамі маракоў і больш як 75 самалётамі на борце.

Канчатковае рашэнне Трамп, верагодна, прыме пасля прыбыцця авіяносца.

На стале ў Трампа ляжаць тры варыянты ваенных дзеянняў

Першы сцэнар прадугледжвае нанясенне авіяўдараў па ваенных аб'ектах і лаяльных да Мадуры падраздзяленнях з мэтай справакаваць яго на ўцёкі і зрабіць уразлівым для захопу.

Крытыкі такога падыходу папярэджваюць, што ён можа мець супрацьлеглы эфект — згуртаваць падтрымку вакол лідара, які апынуўся ў складаным становішчы.

Другі сцэнар — больш рызыкоўны. Ён прадугледжвае прыцягненне элітных спецпадраздзяленняў, такіх як Delta Force (адно з самых засакрэчаных падраздзяленняў першага ўзроўню сакрэтнасці сіл спецыяльных аперацый Узброеных сіл ЗША) або элітнай каманды «марскіх коцікаў» (SEAL Team Six), для прамога захопу або ліквідацыі Мадуры.

Трэці сцэнар — самы складаны і маштабны. Ён прадугледжвае высадку амерыканскіх спецназаўцаў з мэтай узяць пад кантроль аэрадромы, нафтавыя радовішчы і іншую крытычную інфраструктуру краіны.

Гэтыя два варыянты суправаджаюцца значна большай рызыкай для жыцця спецназаўцаў і грамадзянскага насельніцтва.

Белы дом шукае лазейку, каб абысці Кангрэс

Адміністрацыя Трампа шукае юрыдычную лазейку, каб абысці даўнія заканадаўчыя забароны ЗША на забойства замежных лідараў і дзейнічаць без афіцыйнага дазволу Кангрэса.

Міністэрства юстыцыі распрацоўвае дактрыну, згодна з якой Мадура і ягонае асяроддзе будуць прызнаныя цэнтральнымі фігурамі наркатэрарыстычнай групоўкі Cartel de los Soles. Такое вызначэнне, на думку юрыстаў адміністрацыі, робіць Мадуру легітымнай ваеннай мэтай.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com