«Чым менш месцаў засталося ў кіроўцы, тым большая цана»

Людзі расказалі, на што ідуць, каб хутчэй праехаць беларуска-польскую мяжу.

Пасля таго як Літва на месяц закрыла мяжу з Беларуссю, пачалі расці чэргі ў пункце пропуску «Брэст». Паводле звестак Дзяржпагранкамітэта на 20:00 5 лістапада, выезду з нашай краіны ў Польшчу чакалі 3000 легкавых аўтамабіляў і 162 аўтобусы. Тым часам далёка не ўсе гатовыя да працяглага чакання. У сацсетках карыстальнікі расказваюць, на якія хітрасці ідуць, каб скараціць час праходжання мяжы, піша «Зеркало».

У пачатку лістапада мінскі лагапед Марына Ішметава дабіралася ў Італію, у горад Геную. Туды жанчына ляцела з Польшчы. Да Варшавы з беларускай сталіцы адправілася на аўтобусе. Судзячы па яе пасту ў TikTok, дарога прыпала на 2–3 лістапада.

Па словах беларускай, калі яна прыехала на мяжу, наперадзе стаяла больш за сотню аўтобусаў. Жадаючым прапанавалі пашукаць месцы ў транспарце бліжэй да шлагбаума. Праходзячы міма чаргі, жанчына заўважыла, што амаль палова салонаў пуставала, а запоўненымі былі толькі пяты-шосты аўтобусы.

— Але нам падвернуўся выпадак, і мы змаглі паехаць мікрааўтобусам, таму дабраліся дастаткова хутка. У іх была электронная чарга, яны рэгістраваліся за трое сутак <�…>. Калі б мы засталіся на аўтобусе, не паспелі б на самалёт, бо, кажуць, стояць [у чарзе] двое-трое сутак, — патлумачыла Марына.

Яшчэ адной карыстальніцы TikTok трэба было ў Кракаў. Да мяжы з Польшчай яна прыбыла 1 лістапада, на гадзінніку было 13:50 і 95 аўтобусаў у чарзе.

— Нам трошкі пашанцавала — у перавозчыка Intercars быў падменны варыянт, і мы прасунуліся адразу дзесьці на 15 аўтобусаў наперад, — апісвае дзяўчына.

Усё роўна чакаць у чарзе давялося б нямала, таму блогерка вырашыла пашукаць месцы ў транспарце пабліжэй. Яна адзначае, што падсесці можна і ў мікрааўтобусы, таму пагаварыла з кіроўцам аднаго з іх. Ад яго даведалася, што ў прыярытэце рэгулярныя рэйсы. Таму, як правіла, спачатку ідуць тры аўтобусы, а ўжо потым прапускаюць «бусік». А 14:45 аўтарка відэа змагла трапіць у аўтобус, што стаяў трэцім у чарзе, і ў 16:30 ён перасек шлагбаум.

— Час — 18:40, мы прайшлі беларускую мяжу. Стаім каля д'юці-фры, але яшчэ нікуды не едзем <�…>, — паведаміла беларуска. — 21:40. Мы нарэшце пачалі рухацца. Пад’язджаем да шлагбаума з беларускага боку.

На польскую мяжу дзяўчына прыбыла а 23:00, і яе аўтобус быў шостым у чарзе да шлагбаума. Чатыры гадзіны чакання, потым праверка — і да пятай раніцы пасажыры апынуліся ў Польшчы.

— Увесь наш шлях з Мінска да Кракава заняў у суме 26 гадзін. На мяжы мы прастаялі 15 гадзін — ад шлагбаума ў Брэсце да выезду са шлагбаума ў Цярэспалі, — кажа аўтарка відэа. — Дарога была цяжкая, але не знясільваючая. Калі вы маральна да гэтага гатовыя, гатовыя заплаціць грошы, каб перасесці ў найбліжэйшы да прапуску аўтобус — гэта вам абыдзецца ў 50 еўра на чалавека (171 рубель, тут і далей курс Нацбанка на 5 лістапада. — Заўв. рэд.), — то, значыць, даедзеце, куды трэба, у той час, на які разлічылі. Але закладвайце на праходжанне мяжы мінімум суткі. Усё, што менш, — гэта на тоненькага, і можаце не паспець.

«Лічу, гэта добры вынік, хоць таксама не хутка»

У карыстальніцы TikTok Крысціны падобны досвед. Яна ехала з Гомеля ў Вроцлаў 31 кастрычніка.

— У нас было тры квіткі. Два дарослыя па 250 рублёў і адзін дзіцячы за 200. Разам 700 рублёў <�…>, — распавядае беларуска. — Але, даехаўшы да Брэста, мы ўбачылі проста велізарную чаргу. Першапачаткова не збіраліся нікуды перасядаць. Пасля паездкі летам здавалася, пасядзім, пачакаем. Былі гатовыя да гэтага маральна. Потым убачылі, што многія выходзяць з аўтобуса (некаторыя з чамаданамі, некаторыя без) і ідуць проста паглядзець чаргу.

@krystsina.m #граница #брест #бресттересполь #тересполь ♬ оригинальный звук - Krystsina

Сям'я Крысціны таксама вырашыла прагуляцца. Ля шлагбаума іх чакаў прыемны сюрпрыз, тут стаяў аўтобус да Вроцлава, у ім аказаліся свабодныя месцы.

— Спыталі, колькі каштуе перасесці, нам сказалі: «200 рублёў з чалавека». Незалежна, дарослы, дзіця, то-бок на траіх гэта каштавала 600 рублёў, або 200 долараў, — распавядае яна. — Мы пагадзіліся, папярэдзілі, што пойдзем па чамаданы. У выніку не паспелі — пакуль вярнуліся, аўтобус з’ехаў… Нам літаральна не хапіла пару хвілін. Гэта было вельмі цяжка.

Трэба было вяртацца. Аднак чарга і магчымы час чакання палохалі. Па меркаваннях жанчыны, сядзець на мяжы давялося б каля трох сутак. Гэта падштурхоўвала змяніць планы. Так і здарылася, вырашылі падсесці ў аўтобус да Варшавы, а адтуль самастойна дабірацца да Вроцлава.

— Здавалася, гэта быў лепшы варыянт, — не хавае эмоцый Крысціна. — У выніку вярнуліся да шлагбаума. Там стаяў аўтобус, які ехаў да Варшавы. Селі на яго, гэта абышлося ў 90 долараў [на траіх] (268 рублёў. — Заўв. рэд.). Але там была зніжка на дзіця.

Дзяўчына адзначае, што пасля таго, як яны заехалі за шлагбаум на беларускім баку, праходжанне кантролю на абедзвюх межах заняло 11 гадзін.

— Лічу, добры вынік, хоць таксама не хутка, — кажа яна.

На варшаўскім вакзале іх чакалі прыемныя навіны — бліжэйшы аўтобус да Вроцлава ад'язджаў праз паўгадзіны.

— Якія робім высновы? Напэўна, няма сэнсу купляць квіток з Гомеля да Варшавы. Можна было проста паехаць цягніком з Гомеля да Брэста і адтуль узяць таксі да мяжы. Думаю, гэта выйшла б рублёў у 100 беларускіх, — разважае Крысціна, а скептыкаў, якія баяцца, што падсесці ў аўтобус не атрымаецца, дзяўчына супакойвае: месцы былі.

— Спакойна можна было перасесці, — рэзюмуе яна.

«Чым менш месцаў засталося ў кіроўцы, тым большая цана»

Нягледзячы на ўпэўненасць Крысціны, не ўсе лёгка вырашаюцца ісці па яе плане. Два дні таму карыстальніца Treads Таццяна Цярэхова пацікавілася на сваёй старонцы, як лепш выязджаць з Брэста ў краіну-суседку.

— Проста купіць квіток на аўтобус Брэст — Варшава не варыянт? Яны рэальна стаяць гадзінамі-суткамі на мяжы? — спытала яна. — Гэта працоўная схема — ехаць на таксі да мяжы і шукаць аўтобус ля шлагбаума?

Пад яе пытаннем больш за 70 каментароў і многа парад:

«Збіраюся таксама ехаць у чацвер (верагодна, маецца на ўвазе 6 лістапада. — Заўв. рэд.), квіткі на аўтобус Мінск — Варшава даўно куплены. Чытаю [групы па перасячэнні мяжы] і разумею: мы проста заплацілі па 140 рублёў з чалавека, каб даехаць з Мінска ў Брэст. Калі не падсесці, [давядзецца чакаць] больш за двое сутак. А то і трое. За падсадку бяруць 50 еўра (171 рубель. — Заўв. рэд.). Думаю, можа, здаць квіткі і ехаць цягніком, потым на таксі да мяжы і падсаджвацца. З іншага боку, улетку бывала так, што стаяла транспартная інспекцыя і вартвала падсадкі».

«Ехала ў пятніцу (верагодна, 31 кастрычніка. — Заўв. рэд.). Едзьце на таксі да мяжы. Ідзіце ў пачатак [чаргі] і спытайце свабоднае месца ў аўтобусах. Гэта адзіны варыянт. Чым менш месцаў засталося ў кіроўцы, тым большая цана».

«27 кастрычніка ехала аўтобусам Мінск — Варшава. У чарзе аўтобус быў 24-м па ліку. Калі стаў чацвёртым, пачалі падсаджвацца людзі. Падыходзілі да кіроўцаў і вельмі прасіліся. За грошы, так. Ад 50–100 долараў (149–297 рублёў. — Заўв. рэд.)».

«Зараз (верагодна, гаворка пра 3 лістапада. — Заўв. рэд.) на мяжы сотня аўтобусаў у чарзе. Калі хочаце гарантый, то купіце квіток і чакайце, а калі хочаце хутчэй, то схема ехаць да шлагбаума рабочая, але тут ужо як пашанцуе…»

«[Ідзіце] падсесці да людзей у машыну. У асноўным едуць у Цярэспаль. Адтуль цягніком у Варшаву. І далей каму куды. Нават у самыя дрэнныя жнівеньскія дні [час на такое праходжанне] мяжы не перавышаў 4–5 гадзін».

Дарога назад: «Тупа стаіце ў Варшаве на пероне і спадзяецеся, што нейкі аўтобус прыедзе»

Карыстальніца TikTok Эдзіта Іванава дабіралася да Мінска з Лондана, у нашу краіну яна накіроўвалася праз Варшаву. Судзячы па яе акаўнце, у ноч з 3 на 4 лістапада жанчына планавала выехаць з польскага аўтавакзала ў бок беларускай сталіцы.

— Мой аўтобус, які павінен быў адыходзіць у 01:20 ночы, не ад’едзе, — канстатавала яна. — Яго перанеслі на 21:00, то-бок [амаль] на 20 гадзін затрымка. І то не факт, што ён прыедзе.

@edita_ivanovna ♬ original sound - Edita Ivanovna

Але пакуль Эдзіта чакала свой транспарт на вакзале, прыехаў яшчэ адзін аўтобус — ён спазняўся «крыху не на дзесяць гадзін». У ім аказалася свабоднае месца, ахвотных было некалькі. Але заняла яго Эдзіта.

— І вось 1:28 мы на [польскай] мяжы. Наш аўтобус трэці [у чарзе], не ўсё тут так і страшна. Праўда, дадатковы аўтобус мне абышоўся… Ды ўжо пафіг, — не назвала яна суму, якую давялося даплаціць. — Расказваю: з боку Польшчы на ўезд у Беларусь стаяла ўсяго тры аўтобусы. А з боку Беларусі ў Польшчу — 150. Таму ўсе яны прыходзяць з затрымкай. Затрымліваюць на суткі, двое. [На вакзале] ніхто толкам нічога не абвяшчае. Вы проста тупа стаіце ў Варшаве на пероне і спадзяецеся, што нейкі аўтобус прыедзе.

Колькі менавіта гадзін правяла на польска-беларускай мяжы, Эдзіта не сказала.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com