Forbes: Украінская таямнічая зброя збівае расейскія КАБы

З'явілася інфармацыя аб разгортванні УСУ новай зброі.

Расейскія планерныя бомбы істотна змянілі сітуацыю на полі бою. Устаноўка танных кіраваных бомбаў з высоўнымі крыламі і спадарожнікавай навігацыяй дазваляе ператварыць іх у высокадакладную зброю, якую можна запускаць з-за межаў зоны знішчэння сродкаў СПА. Зрэшты, Украіна знайшла спосаб з імі змагацца, піша Forbes.

У 2024 годзе вытворчасць планерных бомбаў значна ўзрасла. Штомесяц Расея выпускае тысячы такіх бомбаў па ўкраінскіх пазіцыях, выклікаючы вялізныя разбурэнні і чалавечыя страты.

Украіна, здаецца, можа супрацьдзейнічаць гэтай пагрозе. На мінулым тыдні прадстаўнік украінскіх Паветраных сіл Украіны паведаміў аб паспяховым збіцці планернай бомбы ў Запарожскай вобласці, адзначыўшы, што гэта не першы такі выпадак, але не раскрыў дэталяў. Ва ўкраінскіх Telegram-каналах з'явілася інфармацыя аб разгортванні новай зброі, здольнай перахапляць гэтыя бомбы, і прагназуецца павелічэнне колькасці такіх поспехаў.

Цяжкія цэлі

Планерныя бомбы з'яўляюцца складанымі мішэнямі з некалькіх прычын. Хоць асобныя мадэлі могуць важыць да трох тон, у асноўным яны маюць масу меншую за тону і размах крылаў меншы за сем футаў. Гэта робіць іх малазаўважнымі на радарах, што абцяжарвае адсочванне і перахоп.

Большасць зэнітных ракет малой далёкасці, такіх як Stinger, абсталяваны інфрачырвоным саманавядзеннем, аднак безматорныя планерныя бомбы не маюць гарачага рэактыўнага выхлапу, што робіць іх нябачнымі для такіх сістэм. Акрамя таго, яны маюць тоўсты сталёвы корпус без уразлівых рухавікоў ці паліўных бакаў, што абцяжарвае іх знішчэнне.

Галоўнай праблемай з'яўляецца масавы характар іх выкарыстання. Як адзначыў Джасцін Бронк з RUSI у інтэрв'ю BBC:

"Вы б занадта хутка скарысталі ўсе наяўныя боепрыпасы супрацьпаветранай абароны".

Таму большасць экспэртаў мяркуе, што спыніць планерныя бомбы можна толькі шляхам знішчэння носьбітаў яшчэ да моманту запуску. Адным са спосабаў з'яўляецца ўзмацненне ўкраінскай СПА ці прадастаўленне большай колькасці F-16, каб прымусіць расейскія самалёты трымацца далей ад зоны дзеяння такіх бомбаў. Іншыя, напрыклад RAND, прапануюць удары па авіябазах, адкуль вылятаюць бамбавікі. Для гэтага патрэбна дальнабойная зброя, такая як ATACMS, пастаўка якой застаецца палітычным пытаннем.

Перахоп бомб

Нягледзячы на складанасць задачы, ёсць спробы знаходзіць спосабы іх збівання. Нядаўна Дырэктарат NATO ў пытаннях трансфармацыі абвясціў аб "інавацыйным выкліку" для барацьбы з планернымі бомбамі. У ім разглядаюцца розныя развзяанні, у тым ліку электронныя перашкоды, прадухіленне ўзлёту носьбітаў і непасрэднае знішчэнне бомб у паветры. Адмысловая ўвага нададзеная сістэмам, якія выкарыстоўваюць штучны інтэлект і машыннае навучанне, а таксама партатыўным і эканамічна выгодным развязанням.

Украіна ўжо выкарыстоўвала падобныя падыходы для барацьбы з выведвальнымі дронамі і дронамі-камікадзэ Shahed. Супраць выведвальных БПЛА былі паспяхова выкарыстаны FPV-дроны-перахопнікі, інтэграваныя ў сэнсарную сетку з інтэлектуальным кіраваннем. А для знішчэння Shahed створаны мабільныя агнявыя групы, абсталяваныя пражэктарамі і аўтаматычнымі гарматамі. Гэта дазволіла дасягнуць высокага ўзроўню эфектыўнасці, напрыклад, у студзені 2024 года Украіна збіла 96% запушчаных Shahed.

Магчыма, развязанне для барацьбы з планернымі бомбамі будзе нечым сярэднім паміж гэтымі метадамі. Яно можа ўключаць радар або іншыя сэнсары для выяўлення пагроз, сістэму кіравання для каардынацыі абароны, а таксама эфектары – недарагія кіраваныя ракеты накшталт Vampire, зэнітныя гарматы тыпу Skynex або новыя высока-хуткасныя робаты-перахопнікі, такія як Wild Hornets Sting. Выкарыстанне штучнага інтэлекту можа падвысіць эфектыўнасць сістэмы.

Як адзначаецца ў дакуменце NATO, ключавым чыннікам з'яўляецца маштабаванасць. Кожная збітая планерная бомба ратуе жыццё, але сістэматычнае іх знішчэнне можа значна прыслабіць наступальныя магчымасці Расеі і змяніць дынаміку канфлікту. Расея зрабіла стаўку на гэтыя бомбы як на асноўны сродак вядзення вайны, і іх эфектыўнасць стала крытычна важнай для яе наступальнай стратэгіі.

Калі Украіна зможа масава ўкараніць сістэму перахопу, гэта зменіць правілы гульні не толькі ў вайне з Расеяй, але і агулам паўплывае на будучыя вайсковыя канфлікты. Напрыклад, ВПС ЗША у значнай ступені спадзяюцца на JDAM, і калі іх можна будзе эфектыўна перахапляць, гэта паставіць пад пагрозу здольнасць ЗША весці баявыя дзеянні ў такіх умовах.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com