З палону ХАМАС вызваленыя яшчэ тры ізраільскія закладнікі

Яны прабылі ў палоне 498 дзён.

У рамках пагаднення аб спыненні агню паміж Ізраілем і палестынскім радыкальным рухам ХАМАС у суботу, 15 лютага, на радзіму вярнуліся яшчэ тры ізраільскія закладнікі, захопленыя баевікамі 7 кастрычніка 2023 года, яны прабылі ў палоне 498 дзён, паведамляе «Нямецкая хваля».

Прадстаўнікі ХАМАС перадалі Міжнароднаму камітэту Чырвонага Крыжа (МКЧК) грамадзяніна Ізраіля і Расеі Аляксандра Труфанава, грамадзяніна Ізраіля і ЗША Сагі Дэкель-Хена і грамадзяніна Ізраіля і Аргенціны Яіра Хорна. У працэдуры, якая транслявалася ў прамым тэлеэфіры, удзельнічалі дзясяткі ўзброеных аўтаматамі баевікоў з закрытымі тварамі, на плошчы горада Хан-Юніс у паўднёвай частцы сектара Газа, дзе адбывалася вызваленне закладнікаў, сабраліся сотні чалавек.

Супрацоўнікі МКЧК падпісалі з баевікамі дакументы аб вызваленні ізраільцянаў. Пасля гэтага закладнікаў вывелі на сцэну і далі ім слова. Ізраільскія Telegram-каналы пішуць, што іх прымусілі выступаць паводле тэкстаў, складзеных джыхадыстамі.

У абмен на вызваленне суграмадзянаў Ізраіль выпусціць з турмаў 369 палестынскіх зняволеных, у тым ліку 36 асуджаных да пажыццёвых тэрмінаў пазбаўлення волі. Гэта самая буйная партыя асуджаных за тэрор у Ізраілі, якія вызваляюцца ў рамках пагаднення з ХАМАС. Большасць з іх будуць дэпартаваныя ў сектар Газа, а астатнія – праз Егіпет у трэція краіны.

Некалькі дзён таму, 10 лютага, у ХАМАС заявілі пра прыпыненне абмену, абвінаваціўшы Ізраіль у парушэнні ўмоваў пагаднення: сярод іншага ў перашкаджэнні вяртанню жыхароў паўночнай часткі сектара Газа і блакаванні гуманітарнай дапамогі. У адказ прэм'ер-міністр Ізраіля Біньямін Нетаньяху высунуў ультыматум, заявіўшы, што калі закладнікі не будуць вызваленыя да поўдня 15 лютага, Ізраіль адновіць баявыя дзеянні. Пасля міжнароднага ціску і пасрэдніцтва пры ўдзеле Егіпта і Катара бакі пагадзіліся прадоўжыць абмен.

Цяперашні абмен з'яўляецца часткай пагаднення аб спыненні агню, дасягнутага ў студзені 2025 года, якое прадугледжвае вызваленне 33 ізраільскіх закладнікаў у абмен на 1900 палестынскіх зняволеных.

На гэты момант у палоне ў ХАМАС застаюцца 73 ізраільскія закладнікі з больш чым 250, захопленых падчас нападу 7 кастрычніка 2023 года. З іх 34 афіцыйна прызнаныя загінулымі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com