Прыгнаць машыну з Еўропы беларусам стане больш складана

ЕЗ увёў частковую забарону на грошы гатоўкай.

Еўрапейскі Звяз зрабіў яшчэ адзін крок да поўнай лічбавізацыі фінансаў і больш спарадкаванай фінансавай сістэмы. Гаворка ідзе пра фактычную забарону на ўгоды гатоўкай вялікага памеру. Беларусам гэта можа прынесці пэўныя нязручнасці, напрыклад пры набыцці аўтамабіля ў краінах ЕЗ. Даведаліся падрабязнасці, піша Telegraf.news.

Строгія абмежаванні на аперацыі гатоўкай ва ўсіх дзяржавах-чальцах ЕЗ, уключаючы суседнюю Польшчу, запрацуюць напоўніцу толькі з 2027 года. Некаторым суб'ектам эканомікі, напрыклад спартовым клубам, прапануецца больш доўгі тэрмін для ўкаранення новых правілаў – да 2029 года.

Афіцыйна захады накіраваныя на барацьбу з адмываннем грошай і фінансаваннем злачыннай дзейнасці, а таксама павышэнне празрыстасці і лічбавізацыі фінансавых сістэмаў. На практыцы ж новыя правілы могуць істотна змяніць спосаб здзяйснення буйных угодаў, такіх як набыццё аўтамабіля.

Што зменіцца з 2027 года?

З 2027 года на ўсёй тэрыторыі Еўрапейскага Звязу будуць фактычна забароненыя плацяжы гатоўкай больш як на 10000 еўраў. Гэтае правіла распаўсюджваецца на транзакцыі ў любой валюце, незалежна ад таго, ці з'яўляецца бок плацяжу фізічнай або юрыдычнай асобай. Польшча, як і іншыя дзяржавы-чальцы, будзе абавязаная ўкараніць новыя правілы, паведаміла польскае выданне Fakt.pl. Больш за тое, асобныя дзяржавы маюць права ўводзіць і ніжэйшыя ліміты – і некаторыя ўжо абвясцілі пра такія захады.

Аднак гэта не адзінае абмежаванне. Для ўгодаў ад 3000 еўраў спатрэбіцца абавязковая ідэнтыфікацыя – гэта значыць пакупнік абавязаны будзе пацвердзіць сваю асобу. Ананімныя разлікі будуць забароненыя, каб выключыць верагоднасць выкарыстання гэтай схемы для ўтойвання незаконных крыніцаў прыбытку.

Гэта значыць, калі беларус надумае набыць новы аўтамабіль у той самай Польшчы, у яго могуць узнікнуць цяжкасці. Проста перавесці грошы на банкаўскі рахунак ужо не атрымаецца – без асабістага наведвання аддзялення банка і павелічэння ліміту пераводу ўжо будзе не абысціся. Зрабіць гэта анлайн будзе немагчыма. Акрамя таго, банк можа запатрабаваць растлумачэнні мэты плацяжу і нават запатрабаваць дакументы, якія пацвярджаюць транзакцыю, напрыклад, дамову куплі-продажу.

Дадатковыя абмежаванні ўлады ЕЗ паабяцалі і карыстальнікам лічбавых валютаў. Крыптавалютныя біржы з 2027 года абавяжуць таксама праводзіць абавязковую ідэнтыфікацыю кліентаў пры любых транзакцыях больш за 1000 еўраў. Гэты захад таксама абгрунтоўваюць барацьбой з фінансавымі злачынствамі, у тым ліку махлярствам.

На што паўплываюць абмежаванні?

Новыя правілы для многіх абяцаюць рэальныя абмежаванні. Набыццё аўтамабіля, дарагой электронікі ці ювелірных вырабаў за гатоўку з 2027 года ў ЕЗ стане практычна немагчымым. Замест грошай гатоўкай людзям давядзецца звяртацца да банкаўскіх пераводаў, картаў або іншых спосабаў аплаты. На практыцы гэта можа сур'ёзна паўплываць на другасны рынак, папярэдзілі эксперты.

Дарэчы, у Польшчы ўжо дзейнічаюць пэўныя абмежаванні на аплату гатоўкай, аднак пакуль яны распаўсюджваюцца толькі на юрыдычных асобаў. Ужо сёння польскія кампаніі не могуць рабіць плацяжы гатоўкай больш як на 15000 злотых. Аднак новыя правілы ЕЗ пойдуць яшчэ далей, бо будуць ужывацца і да фізічных асобаў.

Раней Telegraf.news расказаў, што сёлета ўладальнікам прэміяльных аўтамабіляў у Беларусі ўпершыню давядзецца аплачваць транспартны падатак паводле падвышанай стаўкі. У МПЗ заявілі, што ў Беларусі налічылі блізу 500 тысячаў такіх аўто.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com