«Лукашэнку давялося наступіць сабе на горла»

Усё зусім не так, як кажуць на беларускім тэлебачанні.

Бізнесмен родам з Беларусі Дзмітрый Мазепін, які 3 чэрвеня сустрэўся ў Мінску з Аляксандрам Лукашэнкам, паведаміў, што хоча пабудаваць у нашай краіне завод па вытворчасці водарастваральных угнаенняў для цяплічнага гаспадарства.

— Мы з прэм'ер-міністрам (Беларусі — рэд.) дамовіліся, што пабудуем невялікі завод, які будзе выпускаць водарастваральныя ўгнаенні. Завод будзе пабудаваны на базе Гомельскага хімічнага завода, а гэтыя ўгнаенні — спецыяльныя, якія выкарыстоўваюцца ў цяпліцах. На працягу двух гадоў мы, кампанія «Уралхім», будзем інвеставаць і пабудуем гэтае прадпрыемства, — сказаў Мазепін у эфіры тэлеканала «Беларусь 1».

Падчас падзей 2020-га Мазепін заклікаў беларускія ўлады спыніць бессэнсоўнае крывапраліцце і гвалт у дачыненні да мірных грамадзян. Як так атрымалася, што пасля гэтага прадпрымальніка прымае сам Лукашэнка?

І ці можа гэтая сустрэча быць сігналам амерыканцам, якім кіраўнік прапаноўваў купіць Нежынскі ГОК? «Філін» спытаў пра гэта ў эканамічнага аглядальніка Андрэя Махоўскага.

— Гэта вялікі паварот. Зразумела, што палітычнае выступленне Мазепіна ў 2020-м — гэта найвялікшая падстава для крыўды. Але справа не толькі ў гэтым. Мазепін заўсёды быў канкурэнтам для «Беларуськалія», — кажа Махоўскі.

— Напрыканцы 2024 года ў Мінску затрымалі двух старых сяброў Мазепіна, якія ў мінулым былі яго партнёрамі ў «Уралкаліі». Судзячы па ўсім, гэта адбылося, каб выбіць з Мазепіна згоду на стварэнне новага калійнага картэля. Тады калій прадаваўся ў страту, і Лукашэнка разлічваў дамовіцца з «Уралкаліем». Але нічога не атрымалася.

Сяброў Мазепіна давялося хутка адпусціць. Магчыма, з гэтым таксама было звязана звальненне Галаватага з пасады генеральнага дырэктара «Беларуськалія». То бок, Лукашэнку давялося цалкам адступіць.

Таму цяпер кіраўніку давялося наступіць сабе на горла, прымаючы Мазепіна і распавядаючы, як ён рады яго бачыць. Пры гэтым я б не шукаў тут чорную котку ў цёмным пакоі. Не бачу цяпер прычын для Лукашэнкі жадаць стварыць калійны картэль, бо цэны на калій і без таго растуць, і праблем з іх продажам няма.

Тут, магчыма, усё ў межах заяўленага.

Мазепін даўно цікавіўся Гомельскім заводам. Бо ён не толькі суўладальнік «Уралкалія», у яго яшчэ ёсць «Уралхім». Яго інтарэсы ляжаць не толькі ў калійных угнаеннях. А беларускаму боку проста вельмі патрэбныя грошы.

— Як вы думаеце, ці можа сустрэча Лукашэнкі з Мазепіным, які з'яўляецца акцыянерам «Уралхіма», быць пэўным сігналам амерыканцам: маўляў, пакуль вы думаеце над купляй Нежынскага ГОК, з'яўляюцца і іншыя зацікаўленыя гульцы?

— Я бачыў гэтыя версіі, але гэта была б дзіўная ідэя, таму што мы не бачым з боку Мазепіна жадання купіць гэты руднік. Сам па сабе яго продаж выглядае як нейкі бонус для Амерыкі толькі на беларускім тэлебачанні.

Там сітуацыя наадварот. Калі Лукашэнка прапанаваў амерыканцам купіць Нежынскі ГОК, то яны, напэўна, сказалі: «Окей, а вы нам што за гэта?» Бо гэта прадпрыемства з вялікімі абцяжарваннямі. Там шмат даўгоў, неабходнасць пастаўляць калій на рынак Кітая, плюс яно вырабляе калій, які не падыходзіць для амерыканскага рынку.

Урэшце, там ёсць тэарэтычная перспектыва суда з былым уладальнікам Гуцерыевым. Гэта не такі выгадны актыў, як яго паказваюць на беларускім тэлебачанні.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com