«Нас тут цяпер 15 тысяч»: жыхарка Ірака збірае ў Менску мітынг нелегальных мігрантаў
100- 20.10.2021, 15:14
- 101,220
Уцекачы абураныя падманам з боку рэжыму Лукашэнкі.
У Facebook з'явілася мерапрыемства - нібыта 26 лістапада нелегальныя мігранты, якія захраслі ў Беларусі, збіраюцца правесці мірную дэманстрацыю на плошчы Незалежнасці ў Менску.
The Village Беларусь звязаўся з чалавекам, які называе сябе арганізатарам мерапрыемства.
У апісанні да мерапрыемства гаворыцца: «Годзе беларускай уладзе выкарыстоўваць нашых братоў і сясцёр у якасці жывога шчыта!» (Далей ідуць наўпроставыя і рэзкія абвінавачванні на адрас Лукашэнкі). Сказана таксама, што ў пункце збору будуць «нашы сябры з дабрачынных арганізацый», якія раскажуць, як законна ўехаць у ЕЗ ці атрымаць «дапамогу ў сацыяльным забеспячэнні» для тых, хто хоча застацца ў Беларусі. Таксама бежанцам абяцаюць раздаць зімовую вопратку і ежу.
Арганізатарам мерапрыемства ўказаная Farida (у мэтах бяспекі журналісты не паказваюць нікнэйм цалкам). Мы звязаліся з уладальнікам старонкі і спыталі, ці сапраўды ён ці яна збіраецца арганізаваць дэманстрацыю ў Менску і колькі, на яе (яго) думку, цяпер у Беларусі бежанцаў. Фарыда адказала, што дрэнна гаворыць па-ангельску, тым не менш яна пацвярджае - уцекачы, якія захраслі ў Беларусі, сапраўды збіраюцца мітынгаваць у цэнтры Менска, бо яны цяпер знаходзяцца ў бязвыхадным становішчы.
«Людзям патрэбная дапамога. Браты паміраюць на мяжы, ашуканцы падманваюць іх. Добрыя людзі губляюць усе грошы. Жаўнеры агрэсіўныя і выштурхваюць. Цяпер у Беларусі 15 000 чалавек. Я не хачу, каб нехта яшчэ цяпер ехаў у Беларусь».
Журналісты пацікавіліся, ці ведае Фарыда, што нават мірныя дэманстрацыі ў Беларусі цяпер пад забаронай і ў выніку ўдзельнікі могуць апынуцца на Акрэсціна, на што яна адказала, што ў Іраку мітынгаваць таксама небяспечна, але цяпер яны ў роспачы, «ім патрэбная дапамога добрых людзей», а «беларусы - добрыя людзі».