«У мяне ў сувязі з гэтым глыбока асабістае пытанне»

Замест «росквіту» ў «Белшыны» - страты.

Еўрапейскі звяз паводле пастановы Еўрапейскага суда зняў санкцыі супраць Белшыны. Але я здзіўляюся не таму, што Еўрапейскі звяз зняў гэтыя санкцыі. Ну зняў і зняў. Санкцыі Еўрапейскага звязу - асабістая справа Еўрапейскага звязу. Я крыху здзіўляюся з прычыны, праз якую ён гэта зрабіў, піша Telegram-канал «Лісты да дачкі».

Санкцыі супраць Белшыны Еўрапейскі звяз увёў з-за таго, што Белшына, на думку Еўрапейскага звязу, была важнай крыніцай фінансавання для беларускай улады. А Белшына пайшла ў Еўрапейскі суд і даказала Еўрапейскаму суду, што ніякай крыніцай фінансавання для беларускай улады яна не была. А была зусім наадварот. Крыніцай выдаткаў і галаўнога болю. Таму што прыбыткаў Белшына не атрымлівала, а атрымлівала суцэльныя страты. І вось паколькі Белшына давяля, што яна была стратнай, то Еўрапейскі звяз надумаў, што для санкцый супраць Белшыны няма фармальных падстаў.

І я трошачкі збянтэжаны. Нехта ж нам нядаўна расказваў, як ён узняў Белшыну з каленяў і накіраваў яе на шлях сапраўднага эканамічнага росквіту. Таму што "сусветны попыт на вашу прадукцыю шалёны". І тэлевізар нам рэгулярна распавядаў, як сёй-той выцягнуў Белшыну з фінансавай бездані і, ізноў, жа накіраваў яе на шлях праўдзівага росквіту. Ну ты ў курсе. Сёй-той у тэлевізары можа каго хочаш накіраваць на шлях сапраўднага росквіту.

Гэта значыць, у тэлевізары ў Белшыны росквіт. А ў балансе, які Белшына паказала Еўрапейскаму суду ў графе "росквіт" запісана "страты". І вядома, я здзіўляюся над гэтым трагічнай жыццёвай калізіяй. Таму што ў геаметрыі Эўклідавай эканамічная прастора росквіту і страт паміж сабой не перасякаюцца. Як тыя паралельныя прамыя. Росквіт і страты перасякаюцца паміж сабой толькі ў неэўклідавай геаметрыі беларускага тэлевізара.

І атрымліваецца, што альбо Белшына схлусіла Еўрапейскаму суду, альбо тэлевізар пра яе росквіт нам крыху перабольшыў. Але ж тэлевізар нам хлусіць не будзе. Ён жа не так створаны, каб нам хлусіць. Гэта з аднаго боку. А з іншага боку, балансы ж таксама хлусіць не ўмеюць. І калі Белшына змагла пераканаць Еўрапейскі суд у тым, што яна стратная, то значыць у Белшыны былі для гэтага пераканаўчыя бухгалтарскія падставы.

Ізноў жа. Нам з табой, у адрозненне ад Еўрапейскага суда, балансаў Белшыны даўно не паказвалі. Нам з табой толькі на пальцах расказвалі пра яе росквіт. А канкрэтныя лічбы эканамічнага росквіту нам апошні раз паказвалі ў 2020 годзе. Тады эканамічны росквіт Белшыны ацэньваўся на 190 мільёнаў рублёў страт.

І вось у мяне ёсць у сувязі з гэтым адно, асабістае пытанне. Мне цікава, колькі яшчэ квітнеючых у тэлевізары беларускіх заводаў маглі б як тая Белшына давесці Еўрапейскаму суду, што яны не з'яўляюцца крыніцамі фінансавання для беларускай улады. Таму што ў графе прыбытак у іх таксама запісаны суцэльныя страты.