Польская паліцыя змагаецца з фурамі, якія аб'язджаюць чаргу на мяжы

Беларусу пагражае да пяці гадоў.

У Польшчы будуць судзіць беларускага дальнабойшчыка, які спрабаваў абʼехаць чаргу фураў на мяжы з Беларуссю. Яго абвінавачваюць у выкарыстанні падробленага дакумента. За гэта ў Польшчы можа пагражаць да пяці год пазбаўлення волі. У паліцыі Люблінскага ваяводства заявілі, што падобныя праверкі ля мяжы працягнуцца, каб дысцыплінаваць кіроўцаў, піша MOST.

На польска-беларускай мяжы зараз працуе толькі адзін пункт пропуску для грузавога транспарту – «Кукурыкі – Казловічы». Праз высокую нагрузку там часта ўтвараюцца доўгія чэргі. Некаторыя кіроўцы спрабуюць іх абʼехаць, што запавольвае праходжанне мяжы для добрасумленных дальнабойшчыкаў.

Схем абʼезду чаргі некалькі. Па адной з іх дальнабойшчыкі выкарыстоўваюць «ліпавыя» дакументы аб тым, што вязуць груз, які хутка псуецца. Іх прапускаюць па-за чаргой.

Іншая схема заключаецца ў тым, што кіроўцы купляюць дакументы, у адпаведнасці з якімі нібыта едуць не на мяжу, а да сябе на базу ці ў адрас нейкага кліента, які зарэгістраваны недалёка ад мяжы. Таму паліцыя прапускае іх. Далей яны зноў спрабуюць абʼязджаць чаргу – нібыта едуць у мытнае агенцтва, якое размешчана перад самай мяжой. Там іх таксама прапускаюць без чаргі.

Мяркуючы па ўсім, менавіта такі дакумент 21 сакавіка падаў патрульнай службе 47-летні кіроўца грузавіка DAF. У адпаведнасці з дакументам, мужчына ехаў у адрас адной з фірм у гміне Тэрэспаль і таму збіраўся абʼехаць чаргу. Паліцыянты наважыла праверыць дакумент. Яны звязаліся з супрацоўнікам кампаніі, указанай у ім, але той адмаўляў, што фірма выдала паперу і што фура мае права заязджаць на тэрыторыю кампаніі.

Патрульныя западозрылі, што кіроўца падаў падроблены дакумент, адправілі аўтамабіль на стаянку і выклікалі следчую групу. Беларус унёс заклад, з якога ў выпадку чаго будзе вылічаны штраф. За выкарыстанне падробленых дакументаў у Польшчы пагражае да пяці гадоў пазбаўлення свабоды.

Паліцыянты абвясцілі, што працягнуць праверкі, каб выключыць паўтарэнне падобных сітуацый.