Сіноптык Дзмітры Рабаў: Апошні тыдзень сакавіка «дасць спякоту»

Будзе да +17.

Сіноптык Дзмітры Рабаў у эфіры тэлеканала АНТ расказаў, што апошні тыдзень сакавіка 2024 года ў Беларусі «дасць спякоту», удакладніўшы, што паветра прагрэецца да 17 градусаў.

З ягоных слоў, у пачатку тыдня за надвор'е ў краіне будуць адказваць атмасферныя франты з Балтыйскага мора, якія разам з сабой прынясуць шчыльныя аблокі. Акрамя таго, у многіх раёнах пройдуць кароткачасовыя дажджы, а ў начны і ранішні час магчымы мокры снег і туман. Вецер будзе заходні, паўночна-заходні. У панядзелак, 25 сакавіка ўначы тэмпература паветра складзе ад -3 да +3 градусаў, удзень – ад +7 да +10 градусаў. У аўторак, 26 сакавіка, паветра прагрэецца да +11 градусаў.

Сіноптык дадае, што ўжо ў сярэдзіне тыдня сітуацыя зменіцца, зазначыўшы, што ападкаў не чакаецца. У ранішнія гадзіны магчымы туман. Вецер будзе паўднёвых кірункаў. У сераду, 27 сакавіка, уначы будзе ад -2 да +3 градусаў. Удзень чакаецца да +12 градусаў. У чацвер, 28 сакавіка, у Беларусі пацяплее да +15 градусаў.

Рабаў адзначыў, што, згодна з папярэднім прагнозам, у пятніцу, 29 сакавіка, будзе воблачнае з праясненнямі надворʼе, сказаўшы, пра імавернасць невялікіх ападкаў. Вецер будзе пераменных напрамкаў. Уначы тэмпература паветра складзе ад -2 да +2 градусаў, а ўдзень – да +14 градусаў. Ён паведаміў, што ў апошнія выхадныя сакавіка захаваецца воблачнае з праясненнямі надворʼе. Акрамя таго, магчымы кароткачасовыя дажджы. У суботу, 30 сакавіка, уначы чакаецца ад +3 да +8 градусаў, а ўдзень – да +15. У нядзелю, 31 сакавіка, надворʼе і зусім будзе летнім – паветра прагрэецца да +17 градусаў.