NaviBand да Дня Волі выпусціла новы кліп «Сокал»

У галоўнай ролі - купалавец Ігар Сігоў.

Беларускі гурт NaviBand у Дзень Волі, 25 сакавіка, прадэмантраваў кліп і новую песню «Сокал». У галоўнай ролі — удзельнік тэатральнай трупы «Купалаўцы», заслужаны артыст Беларусі Ігар Сігоў.

«Сокал» — песня з новага альбома NaviBand, рэліз якога запланаваны на восень. Рэжысёр відэа - Арцём Лобач. Здымкі праходзілі ў тым ліку на беларуска-польскай мяжы, піша zerkalo.io.

- Свабода і каханне - гэта тое, за што заўсёды змагаліся людзі. Чалавек імкнецца да сваёй свабоды праз выпрабаванні, праз страты. Гэта балюча, страшна, але праўда на нашым баку, і рана ці позна святло пераможа цемру. У Беларусі, ва Украіне, ва ўсім свеце. Менавіта гэта мы пастараліся адлюстраваць у нашай песні і кліпе, — патлумачыў саліст гурта Арцём Лук'яненка.

- Я адыгрываю ролю чалавека, які змушана пакідае дом. Не таму, што хоча, а таму змушаны ўсё пакінуць і мінуць праз выпрабаванні, якія падрыхтавала яму жыццё. Гэта вельмі блізкая шмат каму цяпер гісторыя, я быў расчулены, калі ўпершыню паслухаў песню. Галоўная ідэя кліпа і песні - не здавацца, дамагацца таго, пра што марыш, як бы ні было складана. Гэта вельмі важна цяпер, - кажа Ігар Сігоў.

25 траўня NaviBand святкуе 10 гадоў на сцэне вялікім канцэртам на адной з галоўных пляцовак Варшавы - у клубе Progresja. Квіткі ёсць у продажы.

NaviBand — музычны гурт з Менска, які працуе ў стылі інды-фолк, інды-рок. Калектыў быў створаны ў 2013 годзе. Гурт прадстаўляў Беларусь на «Еўравізіі-2017» з песняй «Гэта зямля». У асноўным артысты выконваюць свае песні на беларускай мове. Іх трэк «Іншымі» стаў адным з сімвалаў пратэстнага руху ў Беларусі. Удзельнікі гурта вымушаныя былі з'ехаць з краіны.