Ад расейскіх грошай адмовіўся нават кітайскі банк, створаны для працы з Іранам

Ён разглядае расейскіх кліентаў як таксічных.

Расейскаму бізнэсу не ўдаецца прарваць ізаляцыю, якая ўзнікла пасля таго, як ЗША прыстрашылі замежныя банкі другаснымі санкцыямі за працу з Расеяй. Многія ўскладалі вялікія надзеі на кітайскі банк, створаны для працы з падсанкцыйным Іранам, але і ён адмовіўся прымаць грошы з Расеі.

Kunlyn Bank, які кантралюецца Кітайскай нацыянальнай нафтагазавай карпарацыяй (China National Petroleum Corporation, CNPC) апавясціў сваіх кліентаў, што з 29 сакавіка цалкам спыняе апрацоўваць аплаты з Расеі, распавялі The Moscow Times) чатыры расейскіх імпарцёры, якія звярнуліся да яго паслуг пасля таго, як у сакавіку у расейскага бізнэсу ўзніклі вялікія праблемы з пералікам грошай у буйныя кітайскія банкі. Грошы і ў далярах, і ў юанях, і нават у рублях завісалі ў банках, у тым ліку ў дзяржаўным Bank of China, на тыдні, крэдытныя арганізацыі запытвалі дадатковыя дакументы і звесткі, уключаючы гарантыі таго, што прадукцыя не дастанецца ваеннаму комплексу і падсанкцыйным асобамі, і ўсё адно многія ў выніку адмаўлялі. Са статыстыкі буйнога мытнага брокера, агулам з сярэдзіны лютага да сакавіка ў яго кліентаў у Кітай прайшло ўсяго толькі блізу 25% аплат.

Большасць імпарцёраў апошні месяц "бегалі па банках" у пошуках тых, хто хутка адпраўляе і прымае грошы. Kunlyn Bank (былы Karamay City Commercial Bank) здаваўся перспектыўным, таму што быў створаны ў 2006 г. кітайскімі дзяржаўнымі структурамі для разлікаў з іранскімі контрагентамі, якія знаходзяцца пад санкцыямі, найперш за закупку нафты. У 2009 г. банк перайшоў пад кантроль CNPC і меў вялікі досвед працы з санкцыйнымі грашыма, распавядае адзін з імпарцёраў. Здавалася, развязанне знайшлося, бо Kunlyn Bank няма чаго баяцца другасных санкцый: ён сам з 2012 г. уключаны ў санкцыйны спіс ЗША за супрацоўніцтва з Іранам і адрэзаны ад даляравай сістэмы.

“Мы на параду нашых кітайскіх пастаўшчыкоў з пачатку сакавіка пачалі плаціць ім у гэты банк і, нягледзячы на тое, што ўсе нашы калегі пакутавалі ад праблем з пералікам грошай, нашыя аплатны выдатна праходзілі. Але на мінулым тыдні пастаўшчык паведаміў, што Kunlyn апавясціў кліентаў аб спыненні прыёму новых аплат з 21 сакавіка і аб поўным “спыненні” працы з Расеяй з 29 сакавіка”, – кажа суразмоўца выдання.

"Мы пару тыдняў таму кінуліся адкрываць рахунак у гэтым банку на нашу кітайскую юрыдычную асобу, і такіх, як мы, было вельмі шмат - таму што пасля таго, як узніклі праблемы з іншымі кітайскімі банкамі многія рэкамендавалі менавіта гэты як звыклы да санкцый і бясстрашны", - Распавядае мэнэджар у закупках расейскага вытворчага холдынгу. У выніку заяўку кампаніі ўвесь гэты час разглядалі, а некалькі дзён таму паведамілі, што банк наогул не будзе адкрываць рахункаў новым кліентам і спыняе працаваць з расейскімі грашыма, працягвае мэнэджар.

Можна падумаць, яны раней шмат працавалі, іранізуе яшчэ адзін імпарцёр. Расейскіх кліентаў у банка асабліва і не было з-за яго невялікага памеру і высокіх камісій за транзакцыі, тлумачыць ён. Паводле яго слоў, са старых кліентаў у пачатку года банк браў камісію 1,2% за залічэнне сродкаў і 0,3% - за выходную аплату, і яшчэ некалькі дзясяткаў даляраў за кожную аплату, а для новых камісіі даходзілі да 2% - што ужо блізка да камісій аплатных агентаў, якія праводзяць грошы з Расеі ў Кітай праз трэція краіны, з гарантыяй залічэння. Так што расейскі бізнэс звярнуў на банк увагу ад безвыходнасці, а яго катэгарычная адмова ад працы асабліва паказальна ілюструе "прыязнасць" кітайскага бізнэсу, адзначае прадпрымальнік.

Праўда, у Kunlun ужо быў падобны эпізод у гісторыі, звязаны з санкцыямі і Іранам. Пасля таго, як ЗША ў 2018 годзе прыстрашылі Кітай чарговымі санкцыямі за супрацоўніцтва з гэтай дзяржавай, банк абвясціў кліентам, што спыняе прымаць грошы з Ірана і будзе вяртаць усе апалаты. “Наколькі памятаю, паўза доўжылася некалькі месяцаў, потым разлікі аднавіліся. Можа і з Расеяй так будзе”, - спадзяецца адзін з суразмоўцаў выдання.