Галоўны супольнік рэжыму выціскае «Беларуськалій» з кітайскага рынку

Тамака ў лідарах Расея і Канада.

Галоўная мытная ўправа КНР апублікавала звесткі пра імпарт калійных угнаенняў за студзень - люты 2024 года. Паглядзелі, якія пазіцыі на рынку Паднябеснай займае Беларусь ды іншыя краіны, піша myfin.by.

Паводле папярэдніх звестак кітайскай стараны, у студзені - лютым 2024 года агульны аб'ём імпарту КНР у таварнай пазіцыі "Угнаенні мінеральныя або хімічныя, калійныя" склаў $853,6 млн.

Для параўнання: у студзені - лютым мінулага года ўвоз калійных угнаенняў абышоўся Кітаю $895,3 млн.

У пачатку 2024 года найбольшы аб'ём закупак калію (у вартасным вылічэнні) Кітайская Народная Рэспубліка здзейсніла з Расеі - $ 286,9 млн за студзень- люты. Імпарт з Канады склаў $241,2 млн.

Беларусь у спісе дзяржаў, з якіх Кітай імпартуе калійныя ўгнаенні, знаходзіцца на 3-й пазіцыі. За першыя два месяцы 2024 года КНР увезла беларускага калію на суму $141,9 млн.

Што да студзеня-лютага 2023 года кошт імпарту калійных угнаенняў у Кітай з Расеі і Канады павялічыўся, аб'ёмы закупак з Беларусі скараціліся.

Адзначым, што ў пачатку мінулага года Беларусь займала першы радок у спісе ключавых пастаўшчыкоў калію на рынак Паднябеснай. У студзені - лютым 2022 года наша краіна была на 3-м месцы.

Акрамя імпарту з Расеі, Канады і Беларусі, у студзені - лютым бягучага года ўвоз калійных угнаенняў у Кітай таксама ажыццяўляўся і з іншых краін, у тым ліку такіх, як:

Лаос ($99,7 млн);

Ізраіль ($57,6 млн);

Ярданія ($17,2 млн);

Узбекістан ($4,1 млн);

Нямеччына ($3,2 млн).

Невялікія партыі калію паступалі на кітайскі рынак з Вялікабрытаніі, Швэцыі, ЗША, Нідэрландаў, Італіі.

Нагадаем, што ў 2023 годзе Кітайская Народная Рэспубліка імпартавала калійных угнаенняў на $4,75 млрд.

Найбольшы аб'ём закупак (па кошту) прыпадаў на Беларусь: з нашай краіны КНР увезла калійных угнаенняў на суму каля $1,46 млрд.

Імпарт калію з Расейскай Федэрацыі летась склаў $1,13 млрд, з Канады - $803,1 млн, з Лаоса - $630,1 млн, з Ярданіі - $333,7 млн, з Ізраіля - $313,0 млн.