Бізнэс «Газпрама» стаў стратным

Гэта адбылося пасля адключэння паставак Еўропе.

Няўдалая спроба «замарозіць» Еўропу, каб схіліць Захад да саступак датычна Украіны, прадаўжае разбураць «Газпрам».

Паводле вынікаў 2023 года кампанія, якая аперуе самымі буйнымі запасамі газу на планеце, атрымала страту ад асноўнай дзейнасці, вынікае з яе справаздачнасці РСБУ.

На здабычы і продажы газу «Газпрам» страціў 291 млрд рублёў за год, гэта значыць нёс страту 5,6 млрд рублёў у сярэднім кожны тыдзень.

Фармальна кампанія дала справаздачу пра гадавы чысты прыбытак на 695,6 млрд рублёў, але яна цалкам забяспечаная атрыманнем дывідэндаў ад удзелу ў іншых у кампаніях, звяртае ўвагу Сяргей Аляксашанка, экс-намеснік старшыні ЦБ РФ, а цяпер старэйшы навуковы супрацоўнік Інстытута Брукінгса (The Brookings Institution). 895,2 млрд рублёў прынеслі «Газпраму» дзелі ў Газпрамбанку, страхавой групе САГАЗ, «Наватэку» і «Газпрам нафце», прыбытак якіх быў кінуты на тое, каб «залатаць» бюджэт газавай манаполіі.

Паводле справаздачнасці, за мінулы год выручка «Газпрама» ўпала на траціну, аперацыйны прыбытак – на 80%, а чыстая грашовая плынь – розніца паміж паступленнямі на рахункі і адтокам – склала толькі 55,9 млрд рублёў. У выніку «Газпрам» не здолеў істотна аднавіць «грашовую падушку»: у 2022 годзе яна сціснулася ў 6 разоў, з 1,473 трлн да 247 млрд рублёў, а ў 2023-м павялічылася на сціплыя 74 млрд.

Адключыўшы газ большасці еўрапейскіх краінаў, «Газпрам» страціў найбуйнейшы рынак збыту, сувязі з якім выбудоўваліся дзесяцігоддзямі. Летась ягоны экспарт склаў толькі 69 млрд кубаметраў і стаў самым нізкім з 1985 года. У параўнанні з 2022 годам (100,9 млрд кубаметраў), які ўжо стаў горшым для кампаніі за ўсю яе гісторыю, аб'ёмы прапампоўвання газу за мяжу скараціліся яшчэ на траціну. А калі параўноўваць з даваеннымі ўзроўнямі (185 млрд кубоў у 2021 годзе), экспарт «Газпрама» упаў утрая.

Пастаўкі ў Еўропу ўпалі да 28 млрд кубаметраў – узроўню другой паловы 1970-х гадоў. А здабыча «Газпрама» склала толькі 404 млрд кубаметраў і была мінімальнай за 34 гады, што існуе кампанія. У параўнанні з 1990 годам, калі ў газавую дзяржкарпарацыю было пераўтворанае Міністэрства газавай прамысловасці СССР, «Газпрам» страціў траціну здабычы, ці амаль 200 млрд кубоў.