Славакі збіраюць грошы на набоі для Украіны, нягледзячы на пазіцыю прэм'ера Фіца

Усяго за два дні ўдалося сабраць значную суму.

Славакі наважылі падтрымаць чэшскую ініцыятыву па зборы сродкаў на закуп боепрыпасаў для Украіны, сабраўшы ўсяго за два дні больш за 700 тысяч еўраў, паведамляе Euractiv.

Усяго да чэшскай ініцыятывы далучыліся больш за 20 краін, аднак славацкі ўрад адмовіўся, заявіўшы, што канфлікт «не мае ваеннага развязання» і што адпраўка зброі ва «Украіну толькі падоўжыць вайну».

Як піша выданне, грамадзяне Славаччыны не падзяляюць такую пазіцыю ўрада прэм'ер-міністра Роберта Фіца і наважылі «ўзяць справу ў свае рукі».

«Мы не можам змірыцца з тым, што наш урад адмаўляецца дапамагаць нашаму суседу. Давядзём, што Славаччына не баязлівец і стаіць на правільным баку гісторыі, падаўшы дзяржаўнае фінансаванне на боепрыпасы. Давайце дапаможам Украіне, нягледзячы на наш прарасейскі ўрад», - пішуць арганізатары кампаніі на сваім сайце.

Адзначаецца, што акцыю арганізавалі некалькі грамадскіх арганізацый пры падтрымцы вядомых дзеячаў і актывістаў.

Акцыю падтрымаў і амаль 100-гадовы славацкі партызан Ота Шымко, які быў заключаны ў нацысцкім лагеры падчас Другой сусветнай вайны, запісаўшы відэа ў падтрымку акцыі.

«З агрэсарамі немагчыма дамаўляцца, іх трэба перамагаць. Гэта досвед Другой сусветнай вайны тычыцца і Украіны», - сказаў ён.

Адзначаецца, што пры гэтым чыноўнікі не надта ўхвальна ставяцца да збору сродкаў, а некаторыя міністры заявілі, што гэта толькі зацягне вайну.