ЗША і Брытанія ўвялі санкцыі супраць Ірана

За напад на Ізраіль.

Прэзідэнт ЗША Джо Байдэн абвясціў пра новыя санкцыі супраць Ірана ў адказ на паветраную атаку на Ізраіль у ноч на 14 красавіка.

Захады накіраваныя супраць фізічных і юрыдычных асоб, звязаных з Корпусам вартавых ісламскай рэвалюцыі і Міністэрствам абароны Ірана і іншых, якія «садзейнічалі гэтаму нахабнаму нападу», заявіў Байдэн.

На сайце Дзярждэпартамента гаворыцца, што ў спіс увайшлі 16 чалавек і кампаній, якія маюць дачыненне да вытворчасці беспілотнікаў, у тым ліку Kimia Part Sivan Company, і іранскі аўтавытворца Bahman Group і тры яго «дачкі». ЗША таксама зрабілі больш жорсткімі захады экспартнага кантролю, каб абмежаваць доступ Ірана да распрацовак у галіне мікраэлектронікі.

Байдэн паведаміў, што аб уласных абмежаваннях супраць Ірана неўзабаве абвесцяць хаўруснікі ЗША па G7. Новыя захады ўжо ўвяла Вялікая Брытанія, пад іх трапілі шэсць фізічных асоб і арганізацый, у іх ліку - вайскова-марскія сілы КСІР. «Напад іранскага рэжыму на Ізраіль быў безразважным актам і небяспечнай эскалацыяй. <...> Санкцыі, пра якія мы абвясцілі разам з ЗША, паказваюць, што мы ўсе асуджаем такія паводзіны, яны яшчэ больш абмяжуюць здольнасць Ірана дэстабілізаваць рэгіён», — заявіў прэм'ер-міністр Рышы Сунак.

Міністр замежных спраў Брытаніі Дэвід Кэмеран заклікаў Тэгеран «спыніць свае безразважныя і незаконныя паводзіны» і вызваліць захоплены ім у Армузскай пратоцы кантэйнеравоз MSC Ariers, які належыць кампаніі Zodiac Group ізраільскага мільярдэра Эяля Офера.

«Група сямі» 14 красавіка апублікавала заяву, дзе асудзіла напад Ірана, папярэдзіла аб захадах у адказ на «далейшыя ініцыятывы дэстабілізацыі» і выказала падтрымку Ізраілю. Аб планах увесці санкцыі супраць Тэгерана таксама паведаміў Еўразвяз.

Паводле інфармацыі Арміі абароны Ізраілю (ЦАХАЛ), Іран запусціў блізу 350 беспілотнікаў, крылатых і балістычных ракет. Большасць з іх былі перахопленыя за межамі ізраільскай тэрыторыі. У адбіцці атакі ўдзельнічалі амерыканскія і брытанскія вайскоўцы.