Ярамір Ягр у 52 гады забіў першую шайбу ў сезоне

Легендарны чэх забіў на другой хвіліне пасля выхаду на лёд.

Нападнік Ярамір Ягр ва ўзросце 52 гадоў і 63 дзён забіў першы гол у сезоне за свой клуб «Кладна» ў матчы з «Усецінам».

«Кладна» заняў апошняе месца ў рэгулярным чэмпіянаце і гуляе серыю з чэмпіёнам другой чэшскай лігі за месца ў топ-дывізіёне ў наступным сезоне.

У першым матчы каманда Ягра перамагла з лікам 4:1. У другой сустрэчы Ягр, які не гуляў 68 дзён, выйшаў на лёд замест траўмаванага Якуба Клепіша і забіў ужо на другой хвіліне.

У «рэгулярцы» Ягр правёў 15 матчаў і запісаў на свой рахунак чатыры перадачы.

Да 52 гадоў і 11 дзён у НХЛ гуляў канадзец Гордзі Хоў. У 1997 годзе ён аднавіў кар'еру ва ўзросце 69 гадоў і правёў адну змену за «Дэтройт Вайперс» у паўночнаамерыканскай Міжнароднай хакейнай лізе (IHL), стаўшы адзіным прафесіяналам, які гуляў у шэсць розных дзесяцігоддзяў.

Ягр пачаў прафесійную кар'еру яшчэ ў 1988 годзе. У 1990–2017 гадах гуляў у НХЛ, двойчы станавіўся ўладальнікам Кубка Стэнлі (1991, 1992) у складзе «Піцбург Пінгвінз». У 2011 годзе Ягр стаў уладальнікам «Кладна» і гуляе за яго пасля сыходу з «Калгары Флэймз» у 2018-м.

У лютым летась Ягр перасягнуў рэкорд канадца з беларускімі каранямі Уэйна Грэцкі ў колькасці шайбаў у прафесійнай кар'еры, забіўшы 1099-ы гол на ўсіх турнірах (у найвышэйшых лігах Паўночнай Амерыкі і Еўропы, а таксама за нацыянальную каманду).