У Бабруйску бацьку траіх дзяцей «даслоўна ў твар» шпурнулі працоўную кніжку

З запісам аб звальненні за ліпавыя прагулы.

У Бабруйску працаўніка прыватнай фірмы, які да таго ж і шматдзетны бацька, незаконна звольнілі за прагулы. Праз тры месяцы судовых разбораў справядлівасць усё ж перамагла, піша 1prof.by.

— Гісторыя пачалася амаль пяць гадоў таму, — расказвае галоўны прававы інспектар працы Магілёўскай абласной арганізацыі Беларускага прафзвязу работнікаў лесу і прыродакарыстання Дзмітрый Мардачоў. - Невялікая фірма працавала бесперабойна, заробак супрацоўнікам выплачвалі без затрымак. Так працягвалася чатыры гады - і раптам крызіс: на калектыў абрынулася навіна аб ліквідацыі гандлёва-вытворчага прадпрыемства. Людзей абнадзеілі, што выплацяць законныя грошы ў сувязі са звальненнем. Праўда, абавязанні выканалі не для ўсіх. Асабліва не пашанцавала таму самаму намесніку дырэктара ў вытворчасці. Яму даслоўна ў твар шпурнулі працоўную кніжку з запісам аб звальненні за прагулы.

Каб пракарміць траіх дзяцей, мужчына змушана ўладкаваўся гандлёвым прадстаўніком паводле дамовы падраду ў іншую фірму.

А далей арганізацыя памяняла юрыдычны адрас і з Бабруйска перабралася ў Менск. Аднак і гэтая акалічнасць не перашкодзіла галоўнаму прававому інспектару працы абласнога галіновага прафсаюза скласці пазоў у суд Першамайскага раёна Менска. Патрабаванні відавочныя: аднаўленне на працы, спагнанне сярэднядзённага заробку і кампенсацыя маральнай шкоды былому работніку прыватнай фірмы.

Са слоў Змітра Мардачова, кіраўнік дзейнічаў незаконна, бо не пазнаёміў свайго супрацоўніка з загадам аб звальненні і не ўзяў з яго тлумачальную ў сувязі з парушэннем працоўнай дысцыпліны.

- У адпаведнасці з ч. 7 арт. 199 Працоўнага кодэкса работнік, якога не пазнаёмілі ў пяцідзённы тэрмін з загадам аб дысцыплінарным спагнанні, разглядаецца як несапраўдны, - тлумачыць юрыст. - Пастановай суда звальненне прызнана незаконным. Аднаўленне на працы ў сувязі з працэсам ліквідацыі заменена выплатай дзесяціразовага заробку сумай 11 тысяч 100 рублёў. Да таго ж на карысць сябра прафзвяза з наймальніка спагналі кампенсацыю за маральную шкоду. Яна склала 350 рублёў.