Палітолаг: Кітай страляе сабе ў нагу падтрымкай Расеі

КНР нельга назваць нейтральным бокам.

Кітай вядзе шматвектарную палітыку і спрабуе балансаваць, але, падтрымліваючы РФ, страляе сабе ў нагу. Пра гэта FREEДОМ заявіў украінскі палітолаг Максім Джыгун.

Ён адзначыў, што КНР нельга назваць нейтральным бокам, бо фактычна яна дапамагае Расеі весці вайну супраць Украіны.

- Мы разумеем, што па факце сапраўды падтрымка з Кітая ў Расею паступае, прычым паступае ў выглядзе і высокіх тэхналогій, і звычайнай бытавой тэхнікі, і пакупкі газу і нафты, якой яны карыстаюцца цягам больш, чым двух гадоў гэтай вайны… Калі б не падтрымка з боку Кітая ў выглядзе мікрачыпаў і іншых тэхналогій, наўрад ці б на Украіну абрынулася б такая колькасць ракет, якія мы бачым штодня, - сказаў Джыгун.

З яго слоў, з іншага боку, Кітай вядзе шматвектарную замежную палітыку, пры якой спрабуе балансаваць паміж рознымі сіламі.

- Гэта наогул такая сур'ёзная адметнасць кітайскай дыпламатыі ў тым, што яны спрабуюць гуляць са шматлікімі бакамі ў адзін і той жа час. І для гэтага ёсць, увогуле, такія прагматычныя прычыны. Справа ў тым, што Кітай занадта залежны ад амерыканскай эканомікі, ад эканомікі Еўрапейскага Звяза. І з такой адкрытай падтрымкай Расеі яны страляюць сабе ў нагу.

І пасля гэтага разлічваць на тое, што запаволенне кітайскай эканомікі неяк, скажам, зменіцца да лепшага стану, не даводзіцца. Таму яны павінны выбудоўваць такія асобныя лініі стасункаў з рознымі краінамі, з рознымі блокамі для таго, каб, увогуле, уважацца краінай нейтральнай, або той краінай, якая хоча бачыць мір ва Украіне, - сказаў палітолаг.

Джыгун звярнуў увагу на расплывістыя ўмовы для дасягнення міру, пра якія гаворыць Кітай.

- Там нельга зразумець, ці хочуць яны тэрытарыяльнай цэласнасці Украіны, ці ж яны, хутчэй за ўсё, хочуць замарожвання канфлікту паміж Расеяй і Украінай, - адзначыў ён.

Палітолаг таксама канстатаваў, што ў ЗША зараз не самы просты палітычны перыяд, і сёння афіцыйны Вашынгтон вымушаны займаць больш рэзкую пазіцыю ў дачыненні да іншых краін, каб дэманстраваць сваё лідарства.

- І ў гэтых умовах пазіцыя і рыторыка Злучаных Штатаў становіцца яшчэ больш цвёрдай і адназначнай. І візіт Блінкена ў Пекін гаворыць таксама аб тым, што гэты момант падлашчвання і спроб растлумачыць дыпламатычнымі інструментамі, што супрацоўніцтва Кітая з Расеяй будзе мець наступствы для КНР, ужо не працуе. Гэта іншы ўзровень ужо дыпламатыі і стасункаў з тым жа Кітаем. Гэтая пазіцыя становіцца больш цвёрдай. І Кітай насамрэч разумее гэтыя рызыкі для сябе, бо кітайская эканоміка, нягледзячы на тое, што яны ўсяляк дэманструюць незалежнасць, глыбока залежыць ад Злучаных Штатаў, гэтак жа, як і амерыканская эканоміка залежыць ад Кітая. Таму гэта краіны, якія могуць ненавідзець адна адну, але якія павінны супрацоўнічаць і прыслухоўвацца адна да адной, каб выжыць эканамічна і палітычна, - рэзюмаваў госць эфіру.