УСУ адышлі на захад ад Бердычаў, Сямёнаўкі і Новаміхайлаўкі

Пра гэта заявіў галоўны камандзір УСУ.

Галоўны камандзір УСУ Аляксандр Сырскі заявіў, што сітуацыя на фронце абвастрылася і дзе-нідзе расейцы маюць тактычныя поспехі. Паводле ягоных словаў, самая складаная сітуацыя цяпер на Пакроўскім і Курахаўскім кірунках, дзе Сілы абароны адступілі на іншыя пазіцыі.

Пра гэта Сырскі напісаў у нядзелю, 28 красавіка, у сваіх сацсетках.

«Сітуацыя на фронце абвастрылася. Спрабуючы захапіць стратэгічную ініцыятыву і прарваць лінію фронту вораг засяродзіў асноўныя намаганні на некалькіх кірунках, стварыўшы значную перавагу ў сілах і сродках. Актыўна атакуе па ўсёй лініі фронту, на некаторых кірунках – мае тактычныя поспехі», – заявіў галоўны камандзір.

Ён адзначае, што цяпер на фронце адбываецца дынамічная змена абстаноўкі: «Асобныя пазіцыі пераходзяць “з рук у рукі” некалькі разоў цягам дня, што спараджае неадназначнае разуменне сітуацыі».

Сырскі ў пасце расказаў, што цяпер адбываецца на фронце.

«На гэтым тыдні цяжкія баі прадаўжаліся па ўсёй лініі фронту. Абстаноўка дынамічна мянялася – на некаторых кірунках вораг меў тактычны поспех, а на некаторых атрымалася палепшыць тактычнае становішча нашых войскаў», – даклаў галоўны камандзір.

Так у Луганскай вобласці расейцы спрабуюць скарыстацца сваёй перавагай у паветры, ракетах і колькасці артылерыйскіх боепрыпасаў. Галоўнай задачай для сябе вораг ставіць выхад на адміністрацыйную мяжу Луганскай вобласці, піша Сырскі.

На Купянскім кірунку асноўныя кірункі засяроджвання намаганняў ворага – вёскі Стальмахоўка і Бераставое. Там вораг меў частковы поспех, але дзеяннямі нашых падраздзяленняў быў спынены. Таксама прадаўжае наступ на сяло Тэрны на Ліманскім кірунку, спрабуе выцесніць Сілы абароны Украіны за раку Чорны Жарабец, поспеху не мае.

На Северскім кірунку праціўнік наступае ў раёне Белагораўкі і Раздоліўкі, спрабуе прарвацца і блакаваць Северск, каб стварыць умовы для прадаўжэння наступу на Славянск. Поспехаў не мае, ягонае прасоўванне на гэтым кірунку спыненае.

На Краматорскім кірунку гарачымі пунктамі застаюцца Іванаўскі і Часіў Яр. Таксама, вораг спрабуе вярнуць пад свой кантроль Клішчыеўку і выйсці на мяжу па канале Северскі Данец – Данбас

Найбольш складаная сітуацыя, адзначае Сырскі, на Пакроўскім і Курахаўскім кірунках, дзе прадаўжаюцца жорсткія баі.

Паводле ягоных словаў, праціўнік на гэтых кірунках задзейнічаў да чатырох брыгадаў, спрабуе развіць наступ на захад ад Аўдзееўкі і Мар'інкі, прабіваючыся да Пакроўска і Курахава.

«Падраздзяленні Сілаў абароны Украіны, захоўваючы жыццё і здароўе нашых абаронцаў, перамясціліся на новыя рубяжы на захад ад Бердзічаў, Сямёнаўкі і Новаміхайлаўкі», – паведаміў галоўны камандзір.

Ён расказаў, што на гэтых кірунках вораг дасягнуў пэўных тактычных поспехаў, але аператыўнай перавагі атрымаць не змог.

«Украінскія войскі наносяць ворагу максімальныя страты, як у асабовым складзе, так і ў вайсковай тэхніцы. Для ўзмацнення абароны на гэтых кірунках, замены падраздзяленняў, якія панеслі страты, ажыццяўляецца перамяшчэнне брыгадаў, якія аднавілі баяздольнасць», – дадаў ён.