Навукоўцы: Журавіны могуць прадухіляць дыябет і хваробы сэрца

Карысць ёсць ужо на чацвёрты дзень пасля пачатку ўжывання.

Канадскія навукоўцы з Універсітэта Лаваля выявілі, што журавіны паляпшаюць мікрабіёту (супольнасць бактэрый) кішэчніка і дапамагаюць пазбегнуць такіх хранічных захворванняў, як дыябет і хваробы сардэчна-сасудзістай сістэмы. Даследаванне апублікаванае ў навуковым часопісе NPJ Biofilms and Microbiomes (NPJ BFMB).

Журавіны карысныя для здароўя дзякуючы высокаму ўтрыманню поліфенолаў і алігацукрыдаў - невялікіх валокнаў, якія спрыяюць мікробнай актыўнасці.

У рамках даследавання 40 удзельнікаў ужывалі журавінавы дадатак у форме капсул раніцай і ўвечары, што было эквівалентна прыёму 60 грамаў свежых журавін.

У пачатку экспэрыменту і праз чатыры дні ў добраахвотнікаў сабралі ўзоры плазмы крыві, мачы і кала.

Каманда высветліла, што рэчывы з журавінавага экстракту спрыяюць развіццю бактэрый роду Bifidobacterium, што зніжае рызыку развіцця дыябету і сардэчна-сасудзістых захворванняў.

Журавіны таксама стымулююць бактэрыі Akkermansia muciniphila, якія адыгрываюць важную ролю ў слізістай абалонцы кішэчніка, дапамагаючы зменшыць запаленне і ўмацаваць кішачны бар'ер.

Са слоў навукоўцаў, пры ўключэнні ў збалансаваную дыету экстракт журавін можа змяніць узровень запалення ў кішэчніку і палепшыць прагноз хранічных захворванняў. Стымулюючы бактэрыі Akkermansia muciniphila і Bifidobacterium, мікрабіёта рэгенеруе і ўзнаўляе супрацьзапаленчае асяроддзе.

Даследнікі падкрэслілі, што карысць ад прыёму журавін праяўляецца ўжо праз чатыры дні пасля пачатку ўжывання экстракту.