Беларуска спрабавала вярнуць канфіскаваны за нецвярозую язду Nissan

Што пастанавіў суд?

Беларуску судзілі за “п'яную” язду, здзейсненую цягам года пасля накладання адміністрацыйнага спагнання за такое ж парушэнне.

Жанчына падала апеляцыю, палічыўшы прысуд занадта суровым, і прасіла не канфіскоўваць у яе Nissan Qashqai, піша av.by. Адпаведнае вызначэнне суда апублікаванае ў банку судовых пастаноў на партале pravo.by.

Аўтамабілістцы паводле ч. 1 ст. 317 КК прызначанае пакаранне ў выглядзе абмежавання волі на тэрмін 1 год 3 месяцы без накіравання ў папраўчую ўстанову адкрытага тыпу з пазбаўленнем права займацца дзейнасцю, звязанай з кіраваннем транспартнымі сродкамі, на 7 гадоў.

Таксама яна павінна заплаціць штраф у даход дзяржавы сумай 350 базавых адзінак (14 000 рублёў).

А яе Nissan Qashqai у адпаведнасці з ч. 1 ст. 46-1 КК пастанавілі канфіскаваць, прымусова бязвыплатна выключыць ва ўласнасць дзяржавы.

Апеляцыя

У апеляцыйнай скарзе жанчына прасіла ўлічыць поўнае прызнанне ёю віны і чыстасардэчнае раскаянне ва ўчыненым злачынстве, усведамленне супрацьпраўнасці сваіх дзеянняў, а таксама тая акалічнасць, што яна ажыццяўляе догляд сваяка, які пакутуе на захворванне апорна-рухальнага апарата і патрабуе пастаяннага догляду.

Акрамя таго, беларуска спасылалася на цяжкае матэрыяльнае становішча іхняй сям'і. Яна прасіла змякчыць прысуд.

Пастанова суда

Менскі гарадскі суд адзначыў: пакаранне парушальніцы прызначанае з улікам характару і ступені грамадскай небяспекі ўчыненага злачынства, якія ёсць у матэрыялах справы аб яе асобе. У тым ліку было прынятае да ўвагі чыстасардэчнае раскаянне ў зробленым, адсутнасць абцяжарвальных адказнасць абставін.

З матэрыялаў крымінальнай справы бачыцца, што абвінавачаная неаднаразова прыцягвалася да адміністрацыйнай адказнасці за парушэнні ПДР, што “сведчыць аб устойлівай накіраванасці на ўчыненне супрацьпраўных дзеянняў”.

Наяўнасць сваяка, які мае патрэбу ў пастаянным доглядзе, нязначная сума даходу сям'і не з'яўляюцца безумоўнай падставай для зніжэння тэрміну і сумы пакаранняў.

Акрамя таго, абгрунтавана прымененае спецканфіскацыя Nissan Qashqai, на якім і было ўчыненае злачынства. Просьба аб яе невыкарыстанні не заснавана на крымінальным законе, адзначылі ў судзе.

Такім чынам, першапачатковы прысуд пакінуты без змены, а апеляцыйная скарга - без задавальнення.