На Беларусь насоўваецца скандынаўскі антыцыклон Sven

Якое надвор'е прынясе.

Як паведамляе тэматычны тэлеграм-канал аб надвор'і Nadvorie, на гэтым тыдні ў Беларусь прыйдзе скандынаўскі антыцыклон Sven, які нясе з сабой «невялікую порцыю прахалоды». Чакаецца, што 2 траўня слупок тэрмометра ўпадзе на некалькі градусаў на паўночным усходзе, а 3 траўня - у цэнтры нашай краіны.

Паводле звестак Белгідрамета, у чацвер, 2 траўня, надвор'е ў Беларусі будзе вызначаць «вобласць павышанага атмасфернага ціску». На тэрыторыі Рэспублікі Беларусь чакаецца невялікая воблачнасць, у асноўным без ападкаў. Мінімальная тэмпература паветра складзе ад +4 да +10°С, а ўдзень слупок тэрмометра паднімецца ад +17°С на поўначы да +26°С на поўдні краіны. Пры гэтым атмасферны ціск будзе «слаба падаць», паабяцалі сіноптыкі.

У пятніцу, 3 траўня, на тэрыторыю Беларусі пачнуць паступаць «больш прахалодныя паветраныя масы» з паўночнага захаду Расеі. Чакаецца пераменная воблачнасць без ападкаў. Уначы і раніцай у асобных раёнах беларусы змогуць назіраць слабы туман. Тэмпература паветра ўначы будзе вагацца ў межах +2..+9°С, а ўдзень чакаецца ад +14°С на паўночным усходзе да +25°С на паўднёвым захадзе краіны.