Беларускі гандаль чакаюць вялікія змены

Яны могуць набыць моц ужо праз месяц.

Міністэрства антыманапольнага рэгулявання і гандлю (МАРГ) падрыхтавала шэраг змяненняў для гандлю. Сярод іншага чыноўнікі хочуць дазволіць онлайн-продажы БАДаў і піратэхнікі, адмовіцца ад абавязковага набору тавараў у аўтакрамах, а таксама дазволіць крамам браць плату за ўпакоўку разважных кандытарскіх вырабаў. Адпаведны праект дакумента вынесены на грамадскае абмеркаванне, звярнула ўвагу «Зеркало».

Праект пастановы, акрамя іншага, прадугледжвае пашырэнне магчымасцей для гандлю асобнымі тыпамі тавараў. Так, калі раней БАДы можна было прадаваць толькі ў спецыяльна адведзеных месцах у крамах, а некаторыя толькі ў аптэках, то цяпер прапануюць дазволіць іх рэалізацыю ў тым ліку праз інтэрнэт.

Ёсць змены для гандлю піратэхнікай бытавога прызначэння. У выпадку прыняцця дакумента некаторыя яе тыпы можна будзе набыць у айчынных онлайн-крамах. Гэта робіцца для «стварэння роўных умоў для беларускіх суб'ектаў гандлю». Справа ў тым, што раней айчынныя онлайн-крамы не маглі прадаваць такія тавары, у выніку пакупнікі набывалі іх у расейскіх канкурэнтаў.

Пры гэтым для офлайн-крам чыноўнікі зараз таксама падрыхтавалі новаўвядзенні. Напрыклад, хочуць забараніць прадаваць піратэхніку ў сутарэнных памяшканнях.

Дакументам таксама прадугледжаная магчымасць для гандлю браць плату за ўпакоўку тартоў і пірожных, якія прадаюцца на вагу. Раней для такой прадукцыі яна ішла бясплатна (дакладней - уключалася ў кошт прадукцыі). «Гэты захад дазволіць забяспечыць упакоўванне такіх вырабаў у спажывецкую ўпакоўку на выбар пакупніка, не падвышаючы пры гэтым іх кошты», - тлумачаць заканадаўцы.

Крамам і пастаўшчыкам хочуць дазволіць складаць дамову аб вяртанні нерэалізаванай харчовай прадукцыі з тэрмінам прыдатнасці да 30 дзён, калі да заканчэння гэтага перыяду будзе заставацца менш за 48 гадзін. У якасці варыянта дапускаецца замена тавару або кампенсацыя яго кошту. У абгрунтаванні да дакумента распрацоўнікі ўказалі на яго сувязь з актуальнасцю пытання аб вяртанні вытворцам хлебабулачнай прадукцыі.

Аўтакрамам, Duty Free, кніжным, канфіскатам, аптэкам (уключаючы ветаптэкі), сэканд-хэндам, фірмовым крамам, запраўкам маюць дазволіць не складаць абавязковыя пералікі тавараў.

У правілах продажу асобных тавараў прапануюць выключыць пункт, па якім рытэйл можа самастойна (без узгаднення з мясцовымі ўладамі) вызначаць рэжым працы сваіх раздробных гандлёвых аб'ектаў і пунктаў грамадскага харчавання.

Чыноўнікі хочуць, каб многія з прапанаваных зменаў запрацавалі з 11 ліпеня гэтага года.